കൊച്ചി: ആദ്യ സിനിമയിലൂടെ തന്നെ മലയാളികളുടെ മനസ് കീഴടക്കിയ താരമാണ് ഉണ്ണി മുകുന്ദൻ.മസിൽമാനിൽ നിന്നും മാറി വില്ലനായും ഏറ്റവും ഒടുവിൽ മേപ്പടിയാനിലൂടെ നാട്ടിൻ പുറത്തെ വേവലാതികളിൽ ജീവിക്കുന്ന സാധാരണക്കാരനായും ഉണ്ണി തിയേറ്ററുകൾ കീഴടക്കി. സമൂഹമാദ്ധ്യമങ്ങളിൽ അത്ര സജീവമല്ലെങ്കിലും ഉണ്ണി പങ്കുവെയ്ക്കുന്ന ചിത്രങ്ങളും വീഡിയോകളും വളരെ പെട്ടെന്ന് തന്നെ വൈറലാവാറുണ്ട്.
അത്തരത്തിലൊരു വീഡിയോ ആണ് ഇപ്പോൾ ഫേസ്ബുക്കിൽ ആളുകൾ ഏറ്റെടുത്തിരിക്കുന്നത്. മൈതാനത്ത് ക്രിക്കറ്റ് കളിക്കുന്ന വീഡിയോ ആണ് ഉണ്ണി മുകുന്ദൻ തന്റെ ഔദ്യോഗിക ഫേസ്ബുക്ക് പേജിലൂടെ പങ്കുവെച്ചിരിക്കുന്നത്. ഫുൾ കിറ്റണിഞ്ഞ് മൈതനത്ത് നിന്ന് സിക്സ് അടിക്കുന്നതാണ് വീഡിയോ. ഉണ്ണി മുകുന്ദൻ അടിച്ച് പറത്തിയ പന്ത് ഉയരത്തിൽ ബൗണ്ടറിയും കടന്ന് പോകുന്നത് കാണാം.
ബോറടിച്ചിരിക്കുകയായിരുന്നു, എന്തെങ്കിലും കാണിക്കണമെന്ന് തോന്നി, ദാ കണ്ടോളൂ എന്ന ക്യാപ്ഷനോടെയാണ് ഉണ്ണി വീഡിയോ പങ്ക് വെച്ചിരിക്കുന്നത്. വീഡിയോ പോസ്റ്റ് ചെയ്തതിന് പിന്നാലെ നിരവധി പേർ താരത്തെ അഭിനന്ദിച്ച് രംഗത്തെത്തിയിട്ടുണ്ട്. ഒരു സച്ചിൻ എവിടെയോ ഒളിച്ചിരിക്കുന്നുണ്ടെന്നാണ് ഒരു ആരാധകൻ കുറിച്ചിരിക്കുന്നത്.
വീടിന്റെ മുകളിലേക്ക് അടിച്ചിട്ട് ഔട്ട് ആവാത്ത ക്രിക്കറ്റോ എന്ന രീതിയിലുള്ള തമാശകളും പലരും വീഡിയോയ്ക്ക് താഴെ കമൻ്റ് ആയി എഴുതിയിട്ടുണ്ട്. പുതിയ ഏതെങ്കിലും സിനിമയക്ക് വേണ്ടിയുള്ള തയ്യാറെടുപ്പാണോ എന്ന് ചോദിച്ചവരും കുറവല്ല.
Comments