ഇസ്ലാമാബാദ്: പാകിസ്താൻ പ്രധാനമന്ത്രി ഇമ്രാൻ ഖാന് തിരിച്ചടി. ഇമ്രാനെതിരായ അവിശ്വാസ പ്രമേയത്തിൽ വോട്ടെടുപ്പ് നിഷേധിച്ച ഡെപ്യൂട്ടി സ്പീക്കർ ഖാസിം സൂരിയുടെ നടപടി പാക് സുപ്രീം കോടതി റദ്ദാക്കി. പാക് ദേശീയ അസംബ്ലി പിരിച്ചു വിട്ട നടപടിയും റദ്ദാക്കിയ കോടതി പാകിസ്താൻ ദേശീയ അസംബ്ലി പുന;സ്ഥാപിച്ചു. ചീഫ് ജസ്റ്റിസ് ഉമർ അതാ ബന്ദ്യാൽ അദ്ധ്യക്ഷനായ അഞ്ചംഗ ബെഞ്ചാണ് വിധി പുറപ്പെടുവിച്ചത്.
അവിശ്വാസ പ്രമേയത്തിൽ വോട്ടെടുപ്പ് നടത്താത്തത് ഭരണഘടാനാ വിരുദ്ധമാണെന്ന് വിധി പ്രസ്താവിക്കുന്നതിനിടെ പാക് സുപ്രീം കോടതി ചൂണ്ടിക്കാട്ടി. പാർലമെന്റ് പിരിച്ചു വിടാൻ ഇമ്രാൻ ഖാന് നിർദ്ദശിക്കാനുള്ള അധികാരമോ അവകാശമോ ഇല്ലെന്ന് കോടതി ചൂണ്ടിക്കാട്ടി.
ഇമ്രാൻ ഖാനെതിരായ അവിശ്വാസ വോട്ടെടുപ്പ് ഏപ്രിൽ 9 ശനിയാഴ്ച പത്ത് മണിക്ക് നടത്താനും കോടതി ഉത്തരവിട്ടു. രാജ്യ വ്യാപകമായി തിരഞ്ഞെടുപ്പ് നടത്തുന്നതിന് 6-7 മാസം വരെ സമയം വേണമെന്ന് ദേശീയ തിരഞ്ഞെടുപ്പ് കമ്മീഷൻ കോടതിയിൽ വ്യക്തമാക്കിയിട്ടുണ്ട്. പാകിസ്താൻ തെഹ് രീ കെ ഇൻസാഫ് പാർട്ടിയ്ക്ക് വേണ്ടി അഭിഭാഷകരായ ബാബർ അവാനും പ്രസിഡന്റ് ആരിഫ് ആൽവിയ്ക്കായി അലി സഫറുമാണ് കോടതിയിൽ ഹാജരായത്.
ഇന്ന് ഉച്ചയ്ക്ക് കേസ് പരിഗണിച്ച കോടതി ഡെപ്യൂട്ടി സ്പീക്കറുടെ നടപടി പ്രഥമദൃഷ്ട്യാ ആർട്ടിക്കിൾ 95 ന്റെ ലംഘനമാണെന്ന് നിരീക്ഷിച്ചിരുന്നു.90 ദിവസത്തോളം രാജ്യം നിസ്സഹായരായി കഴിഞ്ഞുവെന്ന് ചൂണ്ടിക്കാട്ടിയ കോടതിയിൽ നിന്ന് തങ്ങൾക്ക് അനുകൂലമായി തന്നെ വിധിയുണ്ടാവുമെന്ന് തന്നെയായിരുന്നു പ്രതിപക്ഷത്തിന്റെ പ്രതീക്ഷ.
ഇന്ന് ഉച്ചയോടെ പൊതു തിരഞ്ഞെടുപ്പിന് തീയതി നിശ്ചയിക്കാൻ ആവശ്യപ്പെട്ട് പാക് പ്രസിഡന്റ് തിരഞ്ഞെടുപ്പ് കമ്മീഷന് കത്തയച്ചിരുന്നു. ഇതിന് പിന്നാലെയാണ് ഇമ്രാൻ ഖാന്റെ മേൽ കനത്ത പ്രഹരവുമായി സുപ്രീം കോടതി വിധിയെത്തിയത്. 90 ദിവസത്തിനകം തിരഞ്ഞെടുപ്പ് നടത്താനായിരുന്നു നീക്കം. വീണ്ടും അധികാര കസേരയിലേറാനുള്ള ഇമ്രാന്റെ തന്ത്രങ്ങളെല്ലാം കാറ്റിൽ പറത്തിയാണ് ഇന്ന് വിധി വന്നിരിക്കുന്നത്.
