ഇസ്ലാമാബാദ്: പാകിസ്താനില് ഇന്ന് അവിശ്വാസപ്രമേയം നേരിടാനിരിക്കെ ഇന്ത്യയെ പുകഴ്ത്തി സംസാരിച്ച ഇമ്രാന് ഖാന് മറുപടിയുമായി പിഎംഎല്-എന് നേതാവും മുന് പ്രധാനമന്ത്രി നവാസ് ഷെരീഫിന്റെ മകളുമായ മറിയം നവാസ്. ഇന്ത്യയെ അത്രയ്ക്ക് ഇഷ്ടമാണെങ്കില് പാകിസ്താന് വിട്ട് ഇന്ത്യയിലേക്ക് പൊയ്ക്കോളാനാണ് മറിയം നവാസ് ഇമ്രാന് ഖാനോട് പറയുന്നത്. ഇന്നലെ രാജ്യത്തെ അഭിസംബോധന ചെയ്ത് സംസാരിക്കവെയാണ് ഇന്ത്യയെ ഇമ്രാന് പ്രശംസിച്ചത്. ഇന്ത്യക്കാര് വളരെ ആത്മാഭിമാനം ഉള്ളവരാണ്. അവര്ക്ക് മേല് ആര്ക്കും ഒന്നും അടിച്ചേല്പ്പിക്കാനാകില്ല. ഇന്ത്യയുടെ വിദേശനയത്തെ നിയന്ത്രിക്കാന് ഒരു വലിയ ശക്തിക്കും കഴിയില്ല. മറ്റാരെക്കാളും നന്നായി തനിക്ക് ഇന്ത്യയെ അറിയാമെന്നും ഇമ്രാന് പറഞ്ഞിരുന്നു.
‘ അധികാരം നഷ്ടപ്പെട്ട് ഭ്രാന്ത് പിടിച്ചിരിക്കുന്ന അവസ്ഥയിലാണ് ചിലര്. മറ്റാരുമല്ല പാര്ട്ടി തന്നെയാണ് അയാളെ പുറത്താക്കിയതെന്ന് ആരെങ്കിലും അയാളോട് ഒന്ന് പറയണം. നിങ്ങള്ക്ക് ഇന്ത്യയെ അത്രയ്ക്ക് ഇഷ്ടമാണെങ്കില്, ഇവിടുത്തെ ജീവിതം ഉപേക്ഷിച്ച് അവിടേക്ക് മാറിക്കോളു. ഇന്ത്യയെ ഇത്രയധികം പുകഴ്ത്തുന്ന ആള് ഇത് കൂടി അറിഞ്ഞിരിക്കണം. ഇന്ത്യയില് പല പ്രധാനമന്ത്രിമാര്ക്കെതിരായി 27 അവിശ്വാസ പ്രമേയങ്ങള് വന്നിട്ടുണ്ട് പക്ഷേ ഒരാള് പോലും ഭരണഘടന, ജനാധിപത്യം, ധാര്മ്മികത ഇതൊന്നും വിട്ട് കളിച്ചിട്ടില്ല. വെറും ഒരു വോട്ടിനാണ് വാജ്പേയി അവിശ്വാസത്തില് പരാജയപ്പെട്ട് വീട്ടിലേക്ക് പോയത്. അദ്ദേഹം നിങ്ങളെ പോലെ രാജ്യത്തേയും ഭരണഘടനയേയും നോക്കുകുത്തികളാക്കി നിര്ത്തുകയല്ല ചെയ്തതെന്നും’ മറിയം നവാസ് പറഞ്ഞു.
പാര്ലമെന്റ് പിരിച്ചുവിട്ട നടപടി ഭരണാഘടനാവിരുദ്ധമാണെന്ന് പാകിസ്താന് സുപ്രീംകോടതി കഴിഞ്ഞ ദിവസം വിധിച്ചിരുന്നു. ഇമ്രാന് ഖാനെതിരായ അവിശ്വാസ പ്രമേയം വോട്ടിനിടാതെ തള്ളിയ ഡെപ്യൂട്ടി സ്പീക്കറുടെ നടപടിയും ചീഫ് ജസ്റ്റിസ് ഉമര് ബന്ദ്യാല് അധ്യക്ഷനായ അഞ്ചംഗ ബെഞ്ച് തള്ളി. പാര്ലമെന്റ് പുനസ്ഥാപിച്ച കോടതി ശനിയാഴ്ച രാവിലെ 9 മണിക്ക് വിളിച്ച് ചേര്ക്കണമെന്നും അവിശ്വാസ പ്രമേയ നടപടികളുമായി മുന്നോട്ട് പോകാനും സ്പീക്കറോട് ആവശ്യപ്പെട്ടിട്ടുണ്ട്.
Comments