ലക്നൗ : ശ്രീരാമന്റെ അവതാര ദിനമായ രാമനവമി ദിനത്തിൽ കാശിയിൽ മുസ്ലീം വിമൻസ് ഫൗണ്ടേഷന്റെയും വിശാൽ ഭാരത് സൻസ്ഥാന്റെയും സംയുക്താഭിമുഖ്യത്തിൽ മുസ്ലീം സ്ത്രീകളും ഹിന്ദു സ്ത്രീകളും ചേർന്ന് ശ്രീരാമ പൂജ നടത്തി. ലംഹിയിലെ സുഭാഷ് ഭവനിലാണ് സ്ത്രീകൾ ഹനുമാൻ ചാലിസ ചൊല്ലി ആരതിപൂജ നടത്തിയത്.
മുസ്ലീം സ്ത്രീകൾ നസ്നീൻ അൻസാരി ഉറുദുവിൽ എഴുതിയ ഭജനകൾ ആലപിക്കുകയും ഹനുമാൻ ചാലിസ ചൊല്ലുകയും ചെയ്തു . അലങ്കാര വിളക്കുകൾ ഒരുക്കി, മഹാ ആരതിയും നടത്തി . സംസ്കാരത്തിന്റെ അഖണ്ഡ പ്രപഞ്ചത്തിന്റെ നായകനാണ് ഭഗവാൻ ശ്രീരാമനെന്ന് മുഖ്യാതിഥി മഹന്ത് ബാലക് ദാസ് ഈ അവസരത്തിൽ പറഞ്ഞു. രാമനില്ലാതെ അഖണ്ഡഭാരതത്തിലെ ജനങ്ങൾക്ക് സ്വത്വമില്ല. മുസ്ലീം സ്ത്രീകൾ നടത്തുന്ന ഈ ശ്രമം ഇസ്ലാമിക മതമൗലികവാദികൾക്ക് ഒരു പാഠമാണ്.
ശ്രീരാമനിൽ നിന്ന് വേർപെടുത്തിയ ഭാരതഭൂമിയുടെ ഭാഗം ഇന്ന് വെറുപ്പിന്റെയും അക്രമത്തിന്റെയും ദാരിദ്ര്യത്തിന്റെയും ദുരവസ്ഥയാണ് നേരിടുന്നതെന്ന് മുസ്ലീം മഹിളാ ഫൗണ്ടേഷൻ ദേശീയ അധ്യക്ഷ നസ്നീൻ അൻസാരി പറഞ്ഞു. പാകിസ്താൻ, ബംഗ്ലാദേശ്, അഫ്ഗാനിസ്ഥാൻ എന്നിവയെല്ലാം അക്രമത്തിന്റെ തീയിൽ ജ്വലിക്കുന്നു. കാരണം അവരെല്ലാം അവരുടെ പൂർവ്വികരിൽ നിന്ന് വേർപിരിഞ്ഞു.
ഇന്നത്തെ അവസ്ഥയിൽ ഈ രാജ്യം ശ്രീരാമനെ സ്തുതിക്കുകയും ആ പാത പിന്തുടരുകയും വേണം. ഇത് ചെയ്യുന്നതിലൂടെ ഒരാൾക്ക് വീണ്ടും സമാധാനവും സമൃദ്ധിയും കണ്ടെത്താനാകും. – നസ്നീൻ അൻസാരി പറഞ്ഞു.
16 വർഷങ്ങൾക്ക് മുൻപ് 2006 മാർച്ചിൽ, ഇന്ത്യൻ നഗരമായ വാരണാസി തുടർച്ചയായി സ്ഫോടന പരമ്പരകൾക്ക് സാക്ഷ്യം വഹിച്ചിരുന്നു . അതിൽ 28 പേർ കൊല്ലപ്പെടുകയും 100 ഓളം പേർക്ക് പരിക്കേൽക്കുകയും ചെയ്തു. അന്ന് സങ്കട് മോചൻ ഹനുമാൻ ക്ഷേത്രത്തിലായിരുന്നു ആദ്യ സ്ഫോടനം നടന്നത് . സാധാരണയായി സ്ത്രീകൾ ഇരിക്കുന്ന ക്ഷേത്രത്തിലെ ഗേറ്റിന് സമീപമുള്ള ഒരു കണ്ടെയ്നറിലാണ് ബോംബ് സ്ഥാപിച്ചത്. ഇതിൽ ഒട്ടേറെ പേർ കൊല്ലപ്പെട്ടിരുന്നു.
ഇതിനു പിന്നാലെ മുസ്ലീം സ്ത്രീകൾ സങ്കട മോചന ക്ഷേത്രത്തിൽ പോയി ഹനുമാൻ ചാലിസ പാരായണം ചെയ്തു. അങ്ങനെ ഇരു സമുദായങ്ങൾക്കിടയിലുള്ള വെറുപ്പ് കെട്ടടങ്ങി . അന്നു മുതൽ കഴിഞ്ഞ 16 വർഷമായി മുസ്ലീം സ്ത്രീകൾ ശ്രീരാമപൂജകളും ആരതിയും ചെയ്യുന്നുണ്ട് . ദൈവം എല്ലാവരുടേതും ആണെന്നും അവയെ വേർതിരിക്കാൻ കഴിയില്ലെന്നുമാണ് ഇവർ പറയുന്നത്. .
