ചെന്നൈ: സ്വച്ഛ്ഭാരത് ആശയം നടപ്പാക്കിയതിന്റെ എല്ലാ ആദരവും ശുചീകരണ തൊഴിലാളികൾക്കുള്ളതാണെന്ന് തമിഴ്നാട് ബിജെപി അദ്ധ്യക്ഷൻ കെ. അണ്ണാമലൈ. ശുചിത്വത്തിന്റെ സന്ദേശത്തിന് ഏറെ പ്രാധാന്യം ലഭിച്ചത് നരേന്ദ്രമോദിയുടെ ഭരണത്തിൻ കീഴിലാണെന്നും ജനങ്ങൾ സ്വച്ഛ്ഭാരതിനെ നെഞ്ചോട് ചേർത്തെന്നും അണ്ണാമലൈ പറഞ്ഞു. ചെന്നൈ കോർപ്പറേഷനിലെ ശുചീകരണ തൊഴിലാളികളെ ആദരിക്കുന്ന ചടങ്ങിലാണ് അണ്ണാമലൈ സന്ദേശം നൽകിയത്.
തമിഴ്നാട്ടിലെ ശുചീകരണ തൊഴിലാളികളെ മുന്നണിപോരാളികളെന്ന് വിശേഷിപ്പിച്ച ബിജെപി സംസ്ഥാന അദ്ധ്യക്ഷൻ ശുചിത്വം നഗരങ്ങളേയും പട്ടണങ്ങളേയും ഗ്രാമങ്ങളേയും വൃത്തിയാക്കുന്നതിനൊപ്പം ആരോഗ്യരക്ഷയും ഉറപ്പാക്കുന്നുവെന്ന സത്യം നാം മറന്നു പോകരുതെന്നും അണ്ണാമലൈ ഓർമ്മിപ്പിച്ചു.
കോടിക്കണക്കിന് ജനങ്ങൾ അധിവസിക്കുന്ന നാട്ടിലെ ശുചിത്വ ചിന്ത ഏറെ പ്രചാരം നേടുകയാണ്. എന്നാൽ അത് ചിലർമാത്രം ചെയ്യേണ്ടതാണെന്ന ചിന്തയാണ് പ്രധാനമന്ത്രി നരേന്ദ്രമോദി മാറ്റിയെടുത്തത്. സാമൂഹ്യകൂട്ടായ്മയാണ് എല്ലാ പ്രശ്നപരിഹാരത്തിനും ആവശ്യമെന്നും പ്രധാനമന്ത്രി ഊന്നിപറയുന്നതും അണ്ണാമലൈ എടുത്തുപറഞ്ഞു.
മഹാനഗരങ്ങളിലെ മാലിന്യകൂമ്പാരങ്ങളെ മാറ്റുന്ന നഗരം ശുചിയാക്കാൻ പരിശ്രമിക്കുന്ന ഓരോ ശുചീകരണതൊഴിലാളികളും നമുക്ക് മാതൃകയാണെന്നും അണ്ണാമലൈ പറഞ്ഞു. ശുചീകരണ തൊഴിലാളികൾക്കൊപ്പം സദ്യയുണ്ടാണ് ബിജെപി തമിഴ്നാട് അദ്ധ്യക്ഷനും മുൻ ഐപിഎസ് ഉദ്യോഗസ്ഥനുമായിരുന്ന കെ.അണ്ണാമലൈ മടങ്ങിയത്.
Comments