തിരുവനന്തപുരം: വൈദ്യുതി ഭവൻ ഉപരോധിച്ച് സമരം ശക്തമാക്കാനള്ള കെഎസ്ഇബി ഓഫീസേഴ്‌സ് അസോസിയേഷന്റെ നീക്കത്തിന് പൂട്ടിടാനൊരുങ്ങി വൈദ്യുതി ബോർഡ് ചെയർമാൻ ബി അശോക്.
കെഎസ്ഇബിയിലെ സമരങ്ങൾ വിലക്കി ചെയർമാൻ ഉത്തരവിറക്കി. സമരത്തിൽ പങ്കെടുക്കുന്നവർക്കെതിരെ അച്ചടക്ക നടപടി സ്വീകരിക്കുമെന്നും ഉത്തരവിൽ പറയുന്നു.നാളെ സമരത്തിൽ പങ്കെടുക്കുന്നവർ ഏപ്രിൽ 5 മുതൽ ഡ്യൂട്ടി ചെയ്യാത്തവരായി കണക്കാക്കും.ചട്ടലംഘനത്തിന് നടപടിയെടുക്കുമെന്നും ഉത്തരവിൽ പറയുന്നു.
സമരം ചെയ്യുന്നവർ തൊഴിലാളികളല്ലെന്നും മാനേജർമാരാണെന്നും അദ്ദേഹം ചൂണ്ടിക്കാട്ടി. പ്രതിദിനം അയ്യായിരം രൂപ മുതൽ പതിനായിരം രൂപ വരെ ശമ്പളം വാങ്ങുന്നവരാണ്.ഇത് ശരിയാണോയെന്ന് ജനം തീരുമാനിക്കട്ടേയെന്നും അദ്ദേഹം വ്യക്തമാക്കി.
സസ്പെൻഡ് ചെയ്ത ഉദ്യോഗസ്ഥരുടെ സ്ഥലംമാറ്റത്തിൽ വിട്ടുവീഴ്ച ഇല്ലെന്നും സ്ഥലം മാറ്റിയത് ബോർഡിന്റെ സുചിന്തിതമായ തീരുമാനമെന്നും അദ്ദേഹം കൂട്ടിച്ചേർത്തു. ഭീഷണിപ്പെടുത്തിയും ദുരാരോപണം ഉന്നയിച്ചും ഒന്നും മാറ്റാൻ കഴിയില്ലെന്നും അദ്ദേഹം പറഞ്ഞു.
ആര് വൈദ്യുതി ഭവൻ വളഞ്ഞാലും കെ.എസ്.ഇ.ബിയോ ചെയർമാനോ വളയില്ലെന്നും അദ്ദേഹം കൂട്ടിച്ചേർത്തു.നൽകേണ്ട നീതി സസ്പെൻഷനിൽ ആയവർക്ക് കൊടുത്തു കഴിഞ്ഞെന്നും അദ്ദേഹം വ്യക്തമാക്കി.എന്നാൽ സമരവുമായി മുന്നോട്ട് പോവാനാണ് ഇടത് സംഘടനയുടെ തീരുമാനം
