തൃശ്ശൂർ: റോമൻ സാമ്രാജ്യത്തെ തന്റെ സൗന്ദര്യത്തിലൂടെ മയക്കിയ ക്ലിയോപാട്രയുടെ സൗന്ദര്യരഹസ്യം കലർത്തിയ സോപ്പുമായി ഖാദി ബോർഡ്. എന്റെ കേരളം പ്രദർശന മേളയിലാണ് ക്ലിയോപാട്രയുടെ സൗന്ദര്യരഹസ്യം കലർത്തിയ സോപ്പ് ഖാദി ബോർഡ് പ്രദർശിപ്പിച്ചത്.
കഴുതപ്പാലിലുള്ള കുളിയാണ് ക്ലിയോപാട്രയുടെ സൗന്ദര്യരഹസ്യമെന്നാണ് ചരിത്രം പറയുന്നത്. ഖാദി ബോർഡിന്റെ ബാനറിൽ ‘ബേമോസ് ബേയ്’ എന്ന ബ്രാന്റാണ് കഴുതപ്പാലിൽ നിന്നും സോപ്പ് നിർമ്മിക്കുന്നത്. പുതിയ സോപ്പ് കഴിഞ്ഞ ദിവസം വ്യവസായമന്ത്രി പി.രാജീവ് തിരുവനന്തപുരത്ത് ഉദ്ഘാടനം ചെയ്തിരുന്നു. ചർമം കണ്ടാൽ പ്രായം പറയുകയേയില്ലെന്ന് പറയുന്നത് പോലെ, പ്രായത്തെ തടഞ്ഞ്, ചർമ്മത്തിന്റെ തിളക്കവും സംരക്ഷണവും നൽകുന്ന വിറ്റാമിൻ എ, ബി1, ബി 2, സി, ഇ തുടങ്ങിയ ഘടകങ്ങൾ കഴുതപ്പാലിൽ ഉണ്ടെന്നാണ് സോപ്പ് നിർമാതാക്കൾ പറയുന്നത്.
ഒരു ലിറ്റർ കഴുതപ്പാലിന് 7000 രൂപ വരെയാണ് അന്താരാഷ്ട്ര വിപണിയിലെ വില. തമിഴ്നാട്ടിൽ നിന്നാണ് സോപ്പ് നിർമ്മാണത്തിനാവശ്യമായ കഴുതപ്പാൽ എത്തിക്കുന്നത്. 475 രൂപയാണ് സോപ്പിന്റെ യഥാർത്ഥ വില. എന്നാൽ 100 ഗ്രാമിന്റെ കഴുതപ്പാൽ സോപ്പ്, 350 രൂപയ്ക്ക് തൃശ്ശൂരിലെ എന്റെ കേരളം പ്രദർശന മേളയിലുള്ള ഖാദി സ്റ്റാളിൽ ലഭിക്കും. തൃശ്ശൂർ പേരമംഗലം സ്വദേശി ശാരി ചങ്ങരംകുമരത്താണ് സംരംഭത്തിന് പിന്നിൽ.
