മുംബൈ:മലയാള സിനിമയിലെ അത്ഭുതമാണ് മണിചിത്രത്താഴ്. എത്ര കണ്ടാലും മതിവരാത്ത ചിത്രം. മോഹൻലാലും സുരേഷ് ഗോപിയും ശോഭനയും മത്സരിച്ചഭിനയിച്ച ഫാസിൽ ചിത്രത്തിന്റെ റീമേക്കുകൾ ഇന്ത്യയിലെ പലഭാഷകളിലും പുറത്തിറങ്ങിയിട്ടുണ്ട്.
കന്നടയിൽ ആപ്തമിത്ര, തമിഴിലും തെലുങ്കിലും ചന്ദ്രമുഖി, ഹിന്ദിയിൽ ഭൂൽ ഭുലയ്യ എന്നീ പേരുകളിലാണിവ ഇറങ്ങിയത്. എല്ലാ ചിത്രങ്ങളും വൻ വിജയമാണ് നേടിയത്.മറ്റ് ഭാഷകളിൽ റീമേക്ക് ചെയ്തിട്ടുണ്ടെങ്കിലും ഇതുവരെയും രണ്ടാം ഭാഗം ഉണ്ടായിട്ടില്ല.
എന്നാൽ പ്രിയദർശൻ സംവിധാനം ചെയ്ത ഹൊറർ ചിത്രം ഭൂൽ ഭുലയ്യയുടെ രണ്ടാം ഭാഗം ഉടൻ പ്രേക്ഷകരിലേക്കെത്തുമെന്നാണ് റിപ്പോർട്ട്. ചിത്രത്തിന്റെ ട്രെയ്ലർ എത്തിക്കഴിഞ്ഞു. അനീസ് ബാസ്മീ സംവിധാനം ചെയ്യുന്ന ചിത്രത്തിൽ കാർത്തിക് ആര്യൻ, തബു, കിയാര അദ്വാനി, രാജ്പാൽ യാദവ്, സഞ്ജയ് മിശ്ര എന്നിവരാണ് പ്രധാന താരങ്ങൾ.
2007ൽ റിലീസ് ചെയ്ത ഭൂൽ ഭുലയ്യയുടെ സീക്വൽ ആയാണ് ചിത്രം ഒരുക്കിയിരിക്കുന്നത്. ചിത്രം മെയ് 20ന് തിയേറ്ററുകളിൽ എത്തും. ടി സീരീസിന്റെയും സിനി വൺ സ്റ്റുഡിയോസിന്റെയും ബാനറിൽ ഭൂഷൺ കുമാർ, മുറാദ് ഖേതാനി, കൃഷൻ കുമാർ എന്നിവരാണ് ചിത്രം നിർമിക്കുന്നത്.
Comments