ന്യൂഡൽഹി: ഇന്ത്യയും ഇന്ത്യയുടെ ചരിത്രവും സിഖുകാരില്ലാതെ അപൂർണ്ണമാണെന്ന് പ്രധാനമന്ത്രി നരേന്ദ്രമോദി. ധൈര്യവും സേവനവും എന്താണെന്ന് പഠിപ്പിച്ചത് സിഖുകാരാണ്. അവർ ലോകത്തിന്റെ വിവിധ ഭാഗങ്ങളിലേക്ക് പോയി അവരുടെ അദ്ധ്വാനത്തിലൂടെ വിജയം നേടി. ഇതാണ് പുതിയ ഇന്ത്യയുടെ ആത്മാവെന്നും പ്രധാനമന്ത്രി പറഞ്ഞു.
ഡൽഹിയിൽ സിഖ് പ്രതിനിധി സംഘങ്ങളുമായി നടത്തിയ കൂടിക്കാഴ്‌ച്ചയിൽ സംസാരിക്കുകയായിരുന്നു അദ്ദേഹം. ഗുരുദ്വാരകളിൽ പോകുക, സേവനത്തിൽ സമയം ചെലവഴിക്കുക, ലംഗാർ നേടുക, സിഖ് കുടുംബങ്ങളുടെ വീടുകളിൽ താമസിക്കുക, ഇതെല്ലാം തന്റെ ജീവിതത്തിന്റെ ഭാഗമാണെന്ന് പ്രധാനമന്ത്രി പറഞ്ഞു. സിഖ് സന്യാസിമാർ തന്നെ ഇടയ്‌ക്കിടെ സന്ദർശിക്കാറുണ്ട്. അവരുടെ കൂട്ടായ്മയാൽ താൻ അനുഗ്രഹിക്കപ്പെട്ടിരിക്കുന്നുവെന്നും പ്രധാനമന്ത്രി പറഞ്ഞു.
ഇന്ത്യയും മറ്റ് രാജ്യങ്ങളുമായുള്ള ബന്ധങ്ങളിൽ സിഖ് വംശജർ നിർണ്ണായക പങ്ക് വഹിച്ചിരുന്നു. കാനഡ, ഇറാൻ, ഫ്രാൻസ് തുടങ്ങി വിവിധ രാജ്യങ്ങൾ സന്ദർശിച്ചപ്പോഴുണ്ടായ വിദേശ സിഖുകാരുമായുള്ള കൂടിക്കാഴ്‌ച്ചയേയും പ്രധാനമന്ത്രി അനുസ്മരിച്ചു. സ്വാതന്ത്ര്യ സമരത്തിലും സ്വാതന്ത്ര്യത്തിന് ശേഷവും സിഖ് സമൂഹം രാജ്യത്തിന് നൽകിയ സംഭാവനകൾ വിലമതിക്കാനാകാത്തതാണ്. മഹാരാജ രഞ്ജിത് സിംഗിന്റെ സംഭാവനയിലും ബ്രിട്ടീഷുകാർക്കെതിരായ പോരാട്ടത്തിലും ജാലിയൻ വാലാബാഗിലും അവരില്ലാതെ ഇന്ത്യയുടെ ചരിത്രം പൂർണ്ണമാകില്ലെന്ന് പ്രധാനമന്ത്രി പറഞ്ഞു.
സിഖ് സമുദായത്തിന് വേണ്ടി കേന്ദ്രസർക്കാർ ആവിഷ്‌കരിച്ച പദ്ധതികളേയും പ്രധാനമന്ത്രി യോഗത്തിൽ എടുത്ത് പറഞ്ഞു. കർത്താർപൂർ സാഹിബ് ഇടനാഴിയുടെ നിർമ്മാണം, ഹർമീന്ദർ സാഹിബ് ഫോറിൻ കോൺട്രിബ്യൂഷൻ റെഗുലേഷൻ ആക്ട് അനുവദിക്കുക, ലംഗറിനെ നികുതി രഹിതമാക്കുക, ഗുരുദ്വാരകൾക്ക് ചുറ്റുമുള്ള ശുചിത്വം വർദ്ധിപ്പിക്കുക എന്നിങ്ങനെ നിരവധി പദ്ധതികളാണ് സിഖ് സമൂഹത്തിന് വേണ്ടി നടപ്പാക്കിയതെന്നും പ്രധാനമന്ത്രി പറഞ്ഞു.
കൊറോണ പകർച്ചവ്യാധിയ്‌ക്കെതിരായ ഇന്ത്യയുടെ പോരാട്ടത്തേയും ആത്മനിർഭർ ഭാരത് പദ്ധതികളും പ്രധാനമന്ത്രി കൂടിക്കാഴ്‌ച്ചയിൽ ചൂണ്ടിക്കാട്ടി. സിഖ് സമുദായത്തെ ഇന്ത്യയുടെ അഭിവാജ്യ ഘടകമായാണ് പ്രധാനമന്ത്രി കാണുന്നത്. അടുത്തിടെ സിഖ്ഗുരു തേജ്ബഹാദൂറിന്റെ 400-ാം ജൻമവാർഷിക ദിനത്തോടനുബന്ധിച്ച് പ്രധാനമന്ത്രി ചെങ്കോട്ടയിൽ പ്രസംഗിച്ചിരുന്നു.
