വാഷിങ്ടണ്: ജോര്ദാനിലെ അമേരിക്കന് സൈനിക താവളത്തിന് നേരെയുണ്ടായ ആക്രമണത്തില് രണ്ട് സൈനികര് കൊല്ലപ്പെട്ടതിനെ തുടര്ന്ന് ഇറാനെതിരെ അമേരിക്ക വീണ്ടും വ്യോമാക്രമണം നടത്തി. ഇറാനിയന് റെവല്യൂഷണറി ഗാര്ഡിനെ ലക്ഷ്യമിട്ടാണ് ഏറ്റവും പുതിയ ആക്രമണമെന്ന് യു.എസ്. സെന്ട്രല് കമാന്ഡ് അറിയിച്ചു. ജോര്ദാനിലെ സൈനിക കേന്ദ്രത്തിന് നേരെ വെള്ളിയാഴ്ച നടന്ന ഡ്രോണ്, മിസൈല് ആക്രമണത്തില് രണ്ട് അമേരിക്കന് സൈനികര് കൊല്ലപ്പെടുകയും ഒരാളെ കാണാതാകുകയും നാല് പേര്ക്ക് ഗുരുതരമായി പരിക്കേല്ക്കുകയും ചെയ്തിരുന്നു. പരിക്കേറ്റവരെ ആശുപത്രിയില് പ്രവേശിപ്പിച്ചിട്ടുണ്ട്.
അമേരിക്കയുടെ വിശദീകരണമനുസരിച്ച്, ഹോര്മുസ് കടലിടുക്കിലൂടെ എണ്ണക്കപ്പലുകളുടെ ഗതാഗതം തടസപ്പെടുത്താനുള്ള ഇറാന്റെ സൈനിക ശേഷി കൂടുതല് ദുര്ബലപ്പെടുത്തുക എന്ന ലക്ഷ്യത്തോടെയാണ് പുതിയ വ്യോമാക്രമണം നടത്തിയത്. ആഗോള എണ്ണവിതരണത്തിന്റെ ഏകദേശം 20 ശതമാനവും ഹോര്മുസ് കടലിടുക്കിലൂടെയാണ് നടക്കുന്നത്. അതിനാല് ഈ മേഖലയിലെ സംഘര്ഷം അന്താരാഷ്ട്ര ഊര്ജ വിപണിയെയും ആഗോള സമ്പദ്വ്യവസ്ഥയെയും ബാധിക്കുമെന്ന ആശങ്ക ശക്തമാണ്.
യുദ്ധം ആരംഭിച്ചതിന് ശേഷം ഇറാന്റെ നേരിട്ടുള്ള ആക്രമണത്തില് അമേരിക്കന് സൈനികര് കൊല്ലപ്പെടുന്ന ആദ്യ സംഭവമാണ് ജോര്ദാനിലെ ആക്രമണമെന്ന് യു.എസ്. സൈന്യം വ്യക്തമാക്കി. സംഘര്ഷം കൂടുതല് രൂക്ഷമാകാനുള്ള സാധ്യത കണക്കിലെടുത്ത് പശ്ചിമേഷ്യയിലെ സുരക്ഷാ സാഹചര്യം അമേരിക്കയും സഖ്യരാജ്യങ്ങളും സൂക്ഷ്മമായി നിരീക്ഷിച്ചുവരികയാണ്.
