ന്യൂഡല്‍ഹി: ദേശീയഗീതമായ ‘വന്ദേ മാതരം’ അപമാനിക്കുന്നത് ശിക്ഷാര്‍ഹ കുറ്റമാക്കുന്ന ‘ദേശീയ ബഹുമതികള്‍ അപമാനിക്കുന്നത് തടയല്‍ (ഭേദഗതി) ബില്‍2026’ രാജ്യസഭയില്‍ നാളെ അവതരിപ്പിക്കും. കേന്ദ്ര ആഭ്യന്തരമന്ത്രി അമിത് ഷായാണ് ബില്‍ അവതരിപ്പിക്കുന്നത്. നാളെ ആരംഭിക്കുന്ന പാര്‍ലമെന്റിന്റെ മണ്‍സൂണ്‍ സമ്മേളനത്തിന്റെ ആദ്യദിനത്തിലാണ് നിര്‍ണായക ഭേദഗതി ബില്‍ സഭയിലെത്തുന്നത്. ദേശീയഗാനമായ ‘ജനഗണമന’യ്‌ക്ക് നിലവിലുള്ള അതേ നിയമപരവും ശിക്ഷാനടപടിയുമായ സംരക്ഷണം ‘വന്ദേ മാതരം’ എന്ന ദേശീയഗീതത്തിനും നല്‍കുകയാണ് ബില്ലിന്റെ ലക്ഷ്യം.
ബില്‍ നിയമമായാല്‍ വന്ദേ മാതരത്തെ മനഃപൂര്‍വം അപമാനിക്കുകയോ, ആലാപനം തടസ്സപ്പെടുത്തുകയോ, തടയാന്‍ ശ്രമിക്കുകയോ ചെയ്യുന്നവര്‍ക്ക് മൂന്ന് വര്‍ഷം വരെ തടവും പിഴയും അല്ലെങ്കില്‍ രണ്ടും കൂടി ലഭിക്കും. നിലവില്‍ ദേശീയ ബഹുമതികള്‍ അപമാനിക്കുന്നത് തടയല്‍ നിയമം ദേശീയഗാനത്തെയും ദേശീയപതാകയെയും ഭരണഘടനയെയും സംരക്ഷിക്കുന്നതാണ്. ഭേദഗതി പ്രാബല്യത്തില്‍ വന്നാല്‍ ദേശീയഗീതവും ഇതേ നിയമപരിരക്ഷയുടെ പരിധിയില്‍ വരും.
ജൂലൈ 9-ന് കേന്ദ്ര ആഭ്യന്തര മന്ത്രാലയം പുറപ്പെടുവിച്ച നിര്‍ദേശപ്രകാരം, സര്‍ക്കാര്‍ ചടങ്ങുകളില്‍ ‘വന്ദേ മാതരം’യും ‘ജനഗണമന’യും ഒരുമിച്ച് ആലപിക്കുമ്പോള്‍ ആദ്യം ‘വന്ദേ മാതരം’ ആലപിക്കണമെന്നും തുടര്‍ന്ന് ദേശീയഗാനം ആലപിക്കണമെന്നുമാണ് നിര്‍ദേശം നല്‍കിയിരുന്നത്. ഇതിന് പിന്നാലെയാണ് ഭേദഗതി ബില്‍ പാര്‍ലമെന്റില്‍ അവതരിപ്പിക്കുന്നത്. ബില്‍ ലോക്‌സഭയും രാജ്യസഭയും പാസാക്കി രാഷ്‌ട്രപതിയുടെ അംഗീകാരം ലഭിച്ചാല്‍, ‘വന്ദേ മാതരം’ അപമാനിക്കുന്നത് ക്രിമിനല്‍ കുറ്റമായി രാജ്യത്ത് പരിഗണിക്കപ്പെടും.
