തിരുവനന്തപുരം: പോലീസ് അറസ്റ്റ് ചെയ്ത പിസി ജോർജ്ജിന് പിന്തുണ പ്രഖ്യാപിച്ച് ബിജെപി. എആർ ക്യാമ്പിലെത്തിച്ച് പിസി ജോർജ്ജിനെ അറസ്റ്റ് ചെയ്യുകയായിരുന്നു. വട്ടപ്പാറയിൽ പിസി ജോർജ്ജിന്റെ വാഹനം തടഞ്ഞ ബിജെപി പ്രവർത്തകർ അദ്ദേഹത്തിന് ഷാൾ അണിയിച്ച് അഭിവാദ്യം ചെയ്തു. വട്ടപ്പാറയിൽ ബിജെപി ജില്ലാ പഠന ശിബിരം നടന്നുവരികയാണ്. ഇതിനെത്തിയ പ്രവർത്തകരാണ് അദ്ദേഹത്തെ ഷാളണിയിച്ചത്.
സംസ്ഥാനത്തെ ബിജെപി നേതാക്കളും പി.സി ജോർജിന് പിന്തുണയുമായി പരസ്യമായി രംഗത്തെത്തിയിട്ടുണ്ട്. പൂഞ്ഞാറിലെ പി സി ജോർജ്ജിന്റെ വീട്ടിലെത്തുകയും ചെയ്തു. ബിജെപി മദ്ധ്യ മേഖല പ്രസിഡന്റ് എൻ ഹരിയുടെ നേതൃത്വത്തിലുള്ള നേതാക്കളാണ് അദ്ദേഹത്തിന്റെ വീട്ടിലെത്തി പിന്തുണ പ്രഖ്യാപിച്ചത്. ബിജെപി നേതാവ് പി കെ കൃഷ്ണ ദാസ് പിസിയുടെ വീട്ടിൽ എത്തി കുടുംബാംഗങ്ങളുമായി സംസാരിച്ചു.
പി.സി ജോർജിനെ ക്രൂശിക്കും മുമ്പ് പിണറായി വിജയൻ ആഭ്യന്തര വകുപ്പ് പൂഴ്ത്തിവെച്ച ഇന്റലിജൻസ് റിപ്പോർട്ടുകൾ പുറത്തുവിടണമെന്ന് പി.കെ കൃഷ്ണദാസ് പറഞ്ഞു. കേരളം ഭീകരവാദികളുടെ താവളമായി മാറിക്കൊണ്ടിരിക്കുകയാണ്. ഭീകരവാദികൾക്ക് കുഴലൂതുന്ന സി.പി.എം ആരെയാണ് പ്രീണിപ്പിക്കാൻ ശ്രമിക്കുന്നതന്ന് വ്യക്തമാണ്. അറസ്റ്റ് ചെയ്ത നടപടിയിൽ ശക്തമായി പ്രതിഷേധിക്കുന്നുവെന്ന് പി.കെ കൃഷ്ണദാസ് വ്യക്തമാക്കി.
Comments