നടനും നിർമ്മാതാവുമായ വിജയ് ബാബുവിനെതിരായ ബലാത്സംഗ കേസ് കഴിഞ്ഞ ദിവസമാണ് പുറത്തുവന്നത്. സിനിമയിൽ അവസരം വാഗ്ദാനം ചെയ്ത് ശാരീരികമായി ഉപദ്രവിച്ചുവെന്ന വെളിപ്പെടുത്തലുമായി യുവനടി എത്തുകയായിരുന്നു. പിന്നാലെ ഒളിവിൽ പോയ വിജയ് ബാബുവിനെതിരെ പോലീസ് അന്വേഷണം ശക്തമാക്കിയിട്ടുണ്ട്. ഇതിനിടെ സാന്ദ്ര തോമസും വിജയ് ബാബുവും തമ്മിലുണ്ടായ പ്രശ്നങ്ങൾ വീണ്ടും ചർച്ചയായിരുന്നു.
ഇപ്പോഴിതാ വിജയ് ബാബുവിനെക്കുറിച്ച് ചോദിച്ചയാൾക്ക് സാന്ദ്ര തോമസ് നൽകിയ മറുപടി വൈറലാവുകയാണ്. കഴിഞ്ഞ ദിവസം സാന്ദ്ര പങ്കുവെച്ച വീഡിയോയ്ക്ക് ലഭിച്ച കമന്റും അതിന് താരം നൽകിയ മറുപടിയുമാണ് ചർച്ചയാകുന്നത്. വിജയ് ബാബുവിനെക്കുറിച്ച് രണ്ട് വാക്ക് എന്നായിരുന്നു ഒരാൾ സാന്ദ്രയുടെ പോസ്റ്റിന് താഴെ കമന്റ് ചെയ്തത്. ഒറ്റവാക്കേയുള്ളൂ സൈക്കോ എന്നായിരുന്നു സാന്ദ്രയുടെ മറുപടി.
വിജയ് ബാബുവും സാന്ദ്ര തോമസും ചേർന്നായിരുന്നു ഫ്രൈഡേ ഫിലിംസ് തുടങ്ങിയത്. നിരവധി സിനിമകളായിരുന്നു ഇരുവരും ചേർന്ന് നിർമ്മിച്ചത്. അതിനിടയിലായിരുന്നു സാന്ദ്ര പിൻവാങ്ങിയത്. നേരത്തെ സാന്ദ്ര വിജയ് ബാബുവിനെതിരെ പരാതി നൽകിയിരുന്നു. ഉപദ്രവിച്ചുവെന്ന് പരാതി നൽകിയെങ്കിലും അന്വേഷണത്തിൽ സാക്ഷികൾ കൂറുമാറുകയായിരുന്നു.
