ഇസ്ലാമാബാദ്:കുത്തഴിഞ്ഞ ഭരണകൂടത്തിനൊപ്പം സാങ്കേതിക സംവിധാനങ്ങളുടെ മികവില്ലാത്തതും പാകിസ്താനെ വെട്ടിലാക്കുന്നു. ഇന്നലെ പ്രധാനമന്ത്രി ഷെഹ്ബാസ് ഷെരീഫ് പങ്കെടുത്ത പ്രധാന പരിപാടിയാണ് ജനങ്ങളിലെത്തിക്കാനാകാതെ വാർത്താവിതരണ മന്ത്രാലയവും പിടിവിയും നാണംകെട്ടത്. ഔദ്യോഗിക മാദ്ധ്യമമായ പാക് ടിവിയുടെ ലാപ്ടോപ് പ്രവർത്തിക്കാതിരുന്നതാണ് പരിപാടി സംപ്രേഷണം ചെയ്യാൻ സാധിക്കാതെ വന്നത്.
സംഭവങ്ങളുടെ പേരിൽ പാക് ടിവി ചുമതലക്കാരെ പിരിച്ചുവിട്ടതായി ദേശീയ വാർത്താ വിതരണ പ്രക്ഷേപണ വകുപ്പ് അറിയിച്ചു. പ്രധാനമന്ത്രിയുടെ പരിപാടി സംപ്രേഷണം ചെയ്യാനുള്ള സാങ്കേതിക സംവിധാനങ്ങൾ പോലും കൃത്യമാക്കാത്തതിന്റെ പേരിൽ വലിയ പഴിയാണ് കേൾക്കേണ്ടിവന്നത്. ഇതിനിടെ സ്വകാര്യ ചാനലുകളെ സമീപിച്ച് പ്രധാന പരിപാടികൾ സംപ്രേഷണം ചെയ്താണ് പിടിവിയും മന്ത്രാലയവും മുഖം രക്ഷിച്ചത്.
പുതിയ ഭരണകൂടം ചുമതലയേറ്റ ശേഷം നടന്ന പല ഔദ്യോഗിക പരിപാടികളും ജനങ്ങളിലേയ്ക്ക് വേണ്ടവിധം എത്തുന്നില്ല എന്ന അവസ്ഥയാണ് പാകിസ്താനിലുള്ളത്. കുത്തഴിഞ്ഞ ഭരണ സംവിധാനം ഷരീഫിനും വകുപ്പ് മന്ത്രിമാർക്കും തലവേദന യാവുകയാണ്.
Comments