ന്യൂഡൽഹി : ഡൽഹിയിലെ ആം ആദ്മി സർക്കാരിനെതിരെ രൂക്ഷ വിമർശനവുമായി ബിജെപി. അനധികൃതമായി രാജ്യത്തെത്തിയ രോഹിങ്ക്യൻ കുടിയേറ്റക്കാരെയും ബംഗ്ലാദേശി മുസ്ലീങ്ങളെയും ഡൽഹി സർക്കാർ സംരക്ഷിക്കുകയാണെന്ന് ബിജെപി ഡൽഹി പ്രസിഡന്റ് അദേഷ് ഗുപ്ത പറഞ്ഞു. രാജ്യ തലസ്ഥാനത്ത് കലാപങ്ങൾ അനുദിനം വർദ്ധിച്ചുവരികയാണെന്നും അദ്ദേഹം തുറന്ന കത്തിൽ വ്യക്തമാക്കി.
റോഹിങ്ക്യൻ കുടിയേറ്റക്കാരും ബംഗ്ലാദേശികളും ഉള്ളിടത്തെല്ലാം വൈദ്യുതി കണക്ഷനും വെള്ളവും റേഷനും മറ്റ് ആവശ്യമായ സഹായങ്ങളും ഉടൻ എത്തിക്കണമെന്ന് ഡൽഹി ഉപമുഖ്യമന്ത്രി മനീഷ് സിസോഡിയ എംഎൽഎമാരോട് നിർദ്ദേശിച്ചതായി തനിക്ക് വിവരം ലഭിച്ചിട്ടുണ്ടെന്ന് ഗുപ്ത പറഞ്ഞു. ഇവർക്ക് വേണ്ടി പണം നൽകുകയും പ്രത്യേക സംരക്ഷണം ഒരുക്കുകയും ചെയ്യുന്നുണ്ട്. ഇതിനെ ശക്തമായി എതിർക്കണമെന്നും അദേശ് ഗുപ്ത കത്തിൽ ആവശ്യപ്പെട്ടു.
റോഹിങ്ക്യൻ കുടിയേറ്റക്കാരുടെയും ബംഗ്ലാദേശി മുസ്ലീങ്ങളുടെയും കടന്നുകയറ്റത്തെക്കുറിച്ച് നിങ്ങൾ വിവരം ലഭിച്ചാൽ ഉടൻ തന്നെ പോലീസിനെയും ഭരണകൂടത്തെയും അറിയിക്കണം. അത്തരക്കാരെ ഭയപ്പെടേണ്ട ആവശ്യമില്ല. നമ്മുടെ രാജ്യത്തെ പൗരന്മാരല്ലാത്തവരെ ഇവിടെ ജീവിക്കാൻ അനുവദിക്കില്ലെന്നും ബുൾഡോസർ ഇറക്കിയിട്ടാണെങ്കിലും ഡൽഹിയെ വീണ്ടും സുരക്ഷിതമാക്കുമെന്നും അദേശ് ഗുപ്ത ഉറപ്പ് നൽകി.
