സോഷ്യൽമീഡിയയിലൂടെ ലോകത്തെമ്പാടുമുള്ള നിരവധി പേരെ സ്വാധീനിച്ച ശ്രദ്ധേയനായിരുന്നു ജെസ്സെ കോസ്. തന്റെ വളർത്തുനായയോടൊപ്പം ഫോക്സ്-വാഗൻ ബിറ്റിലിന്റെ 1978 മോഡൽ വാഹനത്തിൽ അദ്ദേഹം നടത്തിയ ലോകസഞ്ചാരങ്ങൾ ഏറെ പ്രശസ്തവുമാണ്. ജെസ്സെയുടെ സ്വപ്നസാക്ഷാത്കാരത്തിന് വെറും രണ്ട് ദിവസം ബാക്കിനിൽക്കെ അദ്ദേഹവും വളർത്തുനായയും കാറപകടത്തിൽ കൊല്ലപ്പെട്ടുവെന്ന വാർത്തയാണ് ഇപ്പോൾ സമൂഹമാദ്ധ്യമങ്ങളിൽ നൊമ്പരക്കാഴ്ചയാകുന്നത്.
ബ്രസീലിൽ നിന്നായിരുന്നു ജെസ്സെയുടെ യാത്ര. തന്റെ ഏറ്റവും പ്രിയങ്കരനായ ഗോൾഡൻ റിട്രീവർ ഷുരാസ്റ്റേയ് എന്ന വളർത്തുനായക്കൊപ്പം ആരംഭിച്ച യാത്ര ഏറെ പ്രസിദ്ധമായിരുന്നു. ബ്രസീലിൽ നിന്ന് ലോകരാജ്യങ്ങൾ സഞ്ചരിച്ച് ഒടുവിൽ അലാസ്കയിലെത്തുകയായിരുന്നു ലക്ഷ്യം. 2017ൽ ആരംഭിച്ച ആ സ്വപ്നയാത്ര പൂർത്തിയാകാൻ വെറും രണ്ട് ദിവസം മാത്രം ബാക്കിനിൽക്കെയാണ് ഇരുവരും ലോകത്തോട് വിടപറഞ്ഞിരിക്കുന്നത്.
29-കാരനായ ബ്രസീലിയൻ സ്വദേശി ജെസ്സെ കോസും അദ്ദേഹത്തിന്റെ നായയും മരിച്ചത് കഴിഞ്ഞ തിങ്കളാഴ്ചയായിരുന്നു. ഇരുവരും സഞ്ചരിച്ചിരുന്ന ഫോക്സ്-വാഗൻ എതിർദിശയിൽ വന്നിരുന്ന ഫോർഡുമായി കൂട്ടിയിടിച്ചാണ് അപകടത്തിൽപ്പെട്ടത്. ഇരുവരും തൽക്ഷണം മരിച്ചു. ഇനിയുമേറെ ജീവിതാനുഭവങ്ങൾ ലോകത്തോട് പങ്കുവെക്കാൻ ബാക്കിനിൽക്കെയാണ് ജെസ്സെയുടെയും ഗോൾഡൻ റിട്രീവറിന്റെയും വേർപാട്. 62-കാരനായ ഡ്രൈവറാണ് ഫോർഡ് ഓടിച്ചിരുന്നത്. അതീവ ഗുരുതരമായ അവസ്ഥയിൽ അദ്ദേഹം ആശുപത്രിയിൽ ചികിത്സയിലാണ്.
17 രാജ്യങ്ങളിലൂടെ പ്രയാണം നടത്തിയ ജെസ്സെ കോസും ആരാധകരേറെയുള്ള ആ വളർത്തുനായയും 52,000 മൈൽ ദൂരമാണ് യാത്ര ആരംഭിച്ചതിന് ശേഷം പിന്നിട്ടത്. 2017-ൽ തുടക്കമിട്ട യാത്ര മഹാമാരി ആവിർഭവിച്ചതോടെ അൽപം മന്ദഗതിയിലായിരുന്നു. കൊറോണ വ്യാപന സാഹചര്യത്തിൽ യുഎസ്-മെക്സിക്കോ അതിർത്തി കടക്കാൻ അവർ ഏറെ പാടുപെട്ടു. എന്നിരുന്നാലും 2022 ഫെബ്രുവരിയിൽ യുഎസിലേക്ക് കടന്ന് യാത്ര തുടരാൻ കഴിഞ്ഞു.
തന്റെ യാത്രയും അനുഭവങ്ങളും നിരന്തരമായി ഇൻസ്റ്റഗ്രാമിലൂടെ പങ്കുവെച്ചിരുന്നതിനാൽ 4.5 ലക്ഷത്തോളം ഫോളോവേഴ്സാണ് ജെസ്സെ കോസിനുണ്ടായിരുന്നത്. യാത്രാവിവരങ്ങൾ മാത്രം പങ്കുവെക്കാൻ ജെസ്സെ തുടങ്ങിയ പേജിന് 1.2 മില്യൺ ഫോളോവേഴ്സും ഉണ്ടായിരുന്നു.
മരിക്കുന്നതിന് നാല് ദിവസം മുമ്പാണ് സോഷ്യൽ മീഡിയയിലെ അദ്ദേഹത്തിന്റെ അവസാന പോസ്റ്റ്. സാൻഫ്രാൻസിസ്കോയിലെ ഗോൾഡൻ ഗേറ്റ് ബ്രിഡ്ജിൽ തന്റെ വളർത്തുനായയോടൊപ്പം നിൽക്കുന്ന ചിത്രമാണ് ഒടുവിൽ പങ്കുവെച്ചത്. നിരവധിയാളുകളുടെ ഹൃദയം കീഴടക്കിയ രണ്ട് വ്യക്തിത്വങ്ങൾ ഇനിയില്ലെന്ന വാർത്ത ആരാധകർ പലർക്കും അവിശ്വസനീയമായിരുന്നു. ഒടുവിൽ ജെസ്സെയും അവന്റെ നായയും പുതിയൊരു യാത്ര ആരംഭിച്ചു, ആർക്കും തടസപ്പെടുത്താൻ കഴിയാത്ത യാത്രയെന്നാണ് പലരുടെയും പ്രതികരണം.
