തിരുവനന്തപുരം: നടൻ ആസിഫ് അലിക്ക് സിനിമ ചിത്രീകരണത്തിനിടെ പരിക്ക്. ‘എ രഞ്ജിത്ത് സിനിമ’ എന്ന ചിത്രത്തിന്റെ ഷൂട്ടിങ്ങിനിടെയാണ് നടന് പരിക്കേറ്റത്. തിരുവനന്തപുരത്തായിരുന്നു ഷൂട്ടിങ്.
പരിക്കേറ്റ നടനെ ഉടൻ സമീപത്തുള്ള ആശുപത്രിയിൽ പ്രവേശിപ്പിച്ചു. സിനിമയുടെ ക്ലൈമാക്സ് രംഗം ചിത്രീകരിക്കുന്നതിനിടെ ആയിരുന്നു അപകടമുണ്ടായത്. സംഘട്ടന രംഗമായിരുന്നു ചിത്രീകരിച്ചതെന്നാണ് വിവരം. ആസിഫ് അലിയുടെ കാലിനാണ് പരിക്കേറ്റത്. നടന്റെ പരിക്കുകൾ ഗുരുതരമല്ലെന്ന റിപ്പോർട്ടുകളാണ് പുറത്തുവരുന്നത്.
നവാഗതനായ നിഷാന്ത് സാറ്റുവാണ് ‘എ രഞ്ജിത്ത് സിനിമ’യുടെ സംവിധാനം നിർവഹിക്കുന്നത്. സിനിമയുടെ അവസാന ഷെഡ്യൂൾ തിരുവനന്തപുരത്ത് പുരോഗമിക്കവെയാണ് അപകടം.
