പാലക്കാട്: ഒറ്റപ്പാലത്ത് സിപിഎം ഓഫീസിന് നേരെ ആക്രമണം. ഏരിയ കമ്മിറ്റി ഓഫീസിന് നേരെയാണ് കല്ലേറുണ്ടായത്. സംഭവത്തിന് പിന്നിൽ കോൺഗ്രസ് ആണെന്ന് സിപിഎം ആരോപിച്ചു.
രാത്രി 12 മണിയോടെയായിരുന്നു ഒറ്റപ്പാലം എകെജി മന്ദിരത്തിലെ ഓഫീസിന് നേർക്ക് ആക്രമണം ഉണ്ടായത്. കല്ലേറിൽ ഓഫീസിന്റെ ജനലുകൾ തകർന്നിട്ടുണ്ട്.
മുഖ്യമന്ത്രി സ്വർണവും കറൻസിയും കടത്തിയെന്ന സ്വപ്ന സുരേഷിന്റെ വെളിപ്പെടുത്തലിൽ സർക്കാരിനും പാർട്ടിയ്ക്കുമെതിരെ വ്യാപക പ്രതിഷേധമാണ് നടക്കുന്നത്. ഇതിനിടയിലാണ് സിപിഎം ഓഫീസിന് നേർക്ക് ആക്രമണം ഉണ്ടായത്.
കഴിഞ്ഞ ദിവസവും സംസ്ഥാനത്ത് സിപിഎം ഓഫീസുകൾക്ക് നേരെ ആക്രമണം നടന്നിരുന്നു. കണ്ണൂരിലെയും, കോഴിക്കോട് പേരാമ്പ്രയിലെയും സിപിഎം ഓഫീസുകൾക്ക് നേരെയാണ് ആക്രമണം ഉണ്ടായത്. വിമാനത്തിൽ മുഖ്യമന്ത്രിയ്ക്കെതിരെ കോൺഗ്രസ് പ്രവർത്തകർ പ്രതിഷേധിച്ചതിന് പിന്നാലെ കോൺഗ്രസ് ഓഫീസുകൾക്ക് നേരെ സിപിഎമ്മും വ്യാപക ആക്രമണം നടത്തിയിരുന്നു.
