ന്യൂഡൽഹി: കേന്ദ്രസർക്കാരിന്റെ അഗ്നിപഥ് പദ്ധതിക്കെതിരെ പ്രതിഷേധം തുടരുന്നതിനിടെ പ്രധാനമന്ത്രി നരേന്ദ്രമോദിയിൽ വിശ്വസിക്കാൻ യുവാക്കളോട് അഭ്യർത്ഥിച്ച് ബിജെപി ദേശീയ അദ്ധ്യക്ഷൻ ജെപി നദ്ദ. കർണാടകയിൽ ഗ്രാമപഞ്ചായത്ത് പ്രസിഡന്റുമാരുടെയും വൈസ് പ്രസിഡന്റുമാരുടെയും യോഗത്തെ അഭിസംബോധന ചെയ്യുകയായിരുന്നു അദ്ദേഹം.
”വിപ്ലവകരമായ ഒരു പദ്ധതിയാണ് അഗ്നിപഥെന്ന് യുവാക്കൾ മനസിലാക്കണം. എന്നാൽ നിങ്ങളെ തെറ്റിദ്ധരിപ്പിക്കാനുള്ള നീക്കങ്ങൾ ശക്തമായി നടക്കുന്നുണ്ടെന്ന് എനിക്കറിയാം. എന്നാലും ഞാൻ നിങ്ങളോട് പറയാനാഗ്രഹിക്കുന്നത് ഇതാണ്.. നിങ്ങൾ പ്രധാനമന്ത്രി മോദിയിൽ വിശ്വാസമർപ്പിക്കൂ. അഗ്നിപഥ് പദ്ധതി മനസിലാക്കാൻ ശ്രമിക്കൂ” ജെ.പി നദ്ദ പറഞ്ഞു.
യോഗത്തിനെത്തിയ ഗ്രാമപഞ്ചായത്ത് പ്രസിഡന്റുമാരോടും മറ്റ് ജനപ്രതിനിധികളോടും അവരുടെ ഗ്രാമങ്ങളിലെ യുവാക്കൾക്ക് വേണ്ടി അഗ്നിപഥ് പദ്ധതിയുടെ സന്ദേശം എത്തിക്കാൻ അദ്ദേഹം ആവശ്യപ്പെട്ടു. ”ഇതൊരു വലിയ അവസരമാണ്. പ്രക്ഷോഭത്തിന്റെ പാതയിൽ സഞ്ചരിക്കുന്ന നമ്മുടെ യുവസുഹൃത്തുക്കൾ ചർച്ചയുടെ പാത തിരഞ്ഞെടുക്കാൻ ഞാൻ ആവശ്യപ്പെടുകയാണ്. നിങ്ങളുടെ നല്ലഭാവിക്ക് വേണ്ടി പദ്ധതിയെക്കുറിച്ച് ആഴത്തിൽ അറിയാനും മനസിലാക്കാനും ശ്രമിക്കുക. മോദിയുടെ നേതൃത്വത്തിൽ ബിജെപി എപ്പോഴും ചിന്തിക്കുന്നത് യുവാക്കളെയും രാജ്യത്തെയും കുറിച്ചാണെന്നും ഓർക്കുക.” ജെപി നദ്ദ വ്യക്തമാക്കി.
അഗ്നിപഥ് പദ്ധതി പ്രഖ്യാപിച്ച ശേഷം രാജ്യത്ത് വിവിധയിടങ്ങളിലായി യുവാക്കൾ പ്രക്ഷോഭം തുടരുന്ന സാഹചര്യത്തിലാണ് ബിജെപി അദ്ധ്യക്ഷന്റെ പ്രതികരണം. ബിഹാർ, യുപി, ഒഡിഷ, തെലങ്കാന സംസ്ഥാനങ്ങളിൽ പദ്ധതിക്കെതിരെ ആസൂത്രിതമായ പ്രതിഷേധങ്ങളാണ് നടക്കുന്നത്. ട്രെയിനുകൾ കത്തിച്ചും ജനജീവിതം സ്തംഭിപ്പിച്ചുമാണ് പ്രക്ഷോഭകർ പ്രതിഷേധം തുടരുന്നത്.
Comments