സാൻഫ്രാൻസിസ്കോ: ആൻഡ്രോയിഡ് ഉപയോക്താക്കൾക്ക് സുരക്ഷാ ഭീഷണി ഉയർത്തുന്ന ജനപ്രിയ ആപ്പ് നിരോധിച്ച് ഗൂഗിൾ പ്ലേസ്റ്റോർ. ഗൂഗിൾ പ്ലേസ്റ്റോറിൽ നിന്ന് പിപ് പിക് ക്യാമറ ഫോട്ടോ എഡിറ്റർ( pip pic camera photo editor ) എന്ന ആപ്പാണ് ഗൂഗിൾ പ്ലേസ്റ്റോർ നിരോധിച്ചത്.
ഈ ആപ്പിൽ ഒരു മാൽവെയർ ഉണ്ടെന്നാണ് കണ്ടെത്തിയിരിക്കുന്നത്. ഉപയോക്താക്കളുടെ യൂസർനെയിം,പാസ്വേഡ് ഉൾപ്പെടെയുള്ള ഫേസ്ബുക്ക് വിവരങ്ങൾ മോഷ്ടിക്കാൻ കഴിവുള്ള മാൽവെയറാണ് ഇത്.
അക്കൗണ്ടുകൾ ആക്സസ് ചെയ്യാനും വ്യക്തിഗത ഡാറ്റ മോഷ്ടിക്കാനും കോൺടാക്റ്റുകളിലേക്ക് സ്കാം സന്ദേശങ്ങൾ അയക്കാനും ഇത് ഹാക്കർമാരെ അനുവദിച്ചേക്കാം എന്നും ഗൂഗിൾ മുന്നറിയിപ്പ് നൽകുന്നുണ്ട്. പുതിയ സുരക്ഷ മുന്നറിയിപ്പിൽ ആൻഡ്രോയിഡ് ഉപയോക്താക്കളോട് ഈ ആപ്പ് ഫോണിൽ നിന്ന് നീക്കം ചെയ്യാൻ ഗൂഗിൾ ആവശ്യപ്പെട്ടിട്ടുണ്ട്.ഒപ്പം ഫേസ്ബുക്ക് പാസ്വേർഡ് ഉടൻ മാറ്റാനും നിർദേശം ഉണ്ട്.
പിപ് പിക് ക്യാമറ ഫോട്ടോ എഡിറ്റർ ഇതിനകം ഇൻസ്റ്റാൾ ചെയ്തിട്ടുള്ള ദശലക്ഷക്കണക്കിന് ആളുകളുണ്ടെന്നാണ് ഗൂഗിൾ വ്യക്തമാക്കുന്നത്. സൈബർ സെക്യൂരിറ്റി സ്ഥാപനമായ ഡോ. വെബിലെ ടീം ആണ് ഈ ആപ്പിന്റെ ഭീഷണി ആദ്യം കണ്ടെത്തിയത്.
ഇവരുടെ ഏറ്റവും പുതിയ റിപ്പോർട്ട് അനുസരിച്ച്, അനാവശ്യ പരസ്യങ്ങൾ പ്രദർശിപ്പിക്കാനും ബാറ്ററി ലൈഫ് നശിപ്പിക്കാനും ഫോണിൽ തന്നെ അനധികൃത മാറ്റങ്ങൾ വരുത്താനും കഴിയുന്ന മാൽവെയർ ഉൾപ്പെടുന്ന നാല് ആപ്ലിക്കേഷനുകൾ കൂടി ഇവർ കണ്ടെത്തിയിട്ടുണ്ട്. മാഗ്നിഫയർ ഫ്ലാഷ്ലൈറ്റ്, ആനിമൽ വാൾപേപ്പർ, സോഡിഹോറോസ്കോപ്പ് മുതലായ ആപ്പുകളും സുരക്ഷിതമല്ലെന്ന് ഇവർ ചൂണ്ടിക്കാട്ടുന്നു.
