സിയോള് : തദ്ദേശീയമായി വികസിപ്പിച്ച ആദ്യ റോക്കറ്റ് വിക്ഷേപിച്ച് ദക്ഷിണ കൊറിയ.
മൂന്ന് തലങ്ങളിലായി പ്രവര്ത്തിക്കുന്ന ന്യൂരി റോക്കറ്റാണ് വിക്ഷേപിച്ചത്. ദക്ഷിണ കൊറിയയുടെ ഏക വിക്ഷേപണ കേന്ദ്രമായ തെക്കന് തീരത്ത് വൈകിട്ട് നാലോടെയാണ് വിക്ഷേപണം നടന്നത്. വിക്ഷേപണത്തിന്റെ ഫലങ്ങള് ചൊവ്വാഴ്ച അറിയാനാകുമെന്ന് അധികാരികള് അറിയിച്ചു. ഈ വിക്ഷേപണം വിജയകരമായാല് തദ്ദേശീയമായി വിക്ഷേപിക്കുന്ന ലോകത്തെ പത്താമത്തെ രാജ്യമായി ദക്ഷിണ കൊറിയ മാറും.
രണ്ടാം തവണയാണ് റോക്കറ്റ് വിക്ഷേപിക്കുന്നത്. 2021 ഒക്ടോബറില് നടന്ന വിക്ഷേപണത്തില് 700 കിലോ മീറ്റര് ദൂരം സഞ്ചരിച്ചിരുന്നു. എന്നാല് മൂന്നാമത്തെ ഘട്ടത്തില് കത്തി എരിയേണ്ട റോക്കറ്റിന്റെ ഭാഗങ്ങള് നേരത്തെ കത്തി തീര്ന്നതിനാല് ഭ്രമണപഥത്തിലെത്താന് റോക്കറ്റിന് കഴിഞ്ഞില്ല. വിക്ഷേപണം വിജയകരമായി പൂര്ത്തിയാക്കിയാല് ദക്ഷിണ കൊറിയയുടെ ബഹിരാകാശ പരിധി വര്ദ്ധിക്കുമെന്നും ബഹിരാകാശ അധിഷ്ഠിത സംരക്ഷണ സംവിധാനം മെച്ചപ്പെടുത്താനും കഴിയുമെന്നും വ്യക്തമാക്കി.
സമ്പദ്ഘടനയില് ലോകത്തെ പത്താമത്തെ വലിയ ശക്തിയാണ് ദക്ഷിണ കൊറിയ. സെമി കണ്ടക്ടര്, ഓട്ടോ മൊബൈല്, സ്മാര്ട്ട് ഫോണ് തുടങ്ങിയവ ലോക മാര്ക്കറ്റില് എത്തിക്കുന്നതില് പ്രധാന പങ്ക് വഹിക്കുന്നു. എന്നാല് ബഹിരാകാശ വികസനത്തില് ചൈനയ്ക്കും ഇന്ത്യയ്ക്കും ജപ്പാനും പുറകിലാണ് ദക്ഷിണ കൊറിയ. 1990 മുതല് ദക്ഷിണ കൊറിയ വിക്ഷേപണം നടത്തുന്നുണ്ടെങ്കിലും വിദേശ സാങ്കേതിക വിദ്യയാണ് കൂടുതലും അവലംബിക്കുന്നത്. 2013 ല് കൊറിയയുടെ മണ്ണില് നിന്നും ഉപഗ്രഹം ആദ്യമായി വിക്ഷേപിച്ചിരുന്നെങ്കിലും വിക്ഷേപണ വാഹനത്തിന്റെ നിര്മാണം റഷ്യന് കമ്പനി ആയിരുന്നു.
സൈനിക ഉദ്ദേശത്തോടെയല്ല ന്യൂരി റോക്കറ്റ് വിക്ഷേപിച്ചതെന്ന് ദക്ഷിണ കൊറിയന് അധികാരികള് അറിയിച്ചു.ന്യൂരി റോക്കറ്റില് കുറഞ്ഞ താപനിലയില് സൂക്ഷിക്കേണ്ട ദ്രവരൂപത്തിലുള്ള ഇന്ധനമാണുള്ളത്. മിസൈലായി ഉപയോഗിക്കാന് പ്രയാസമുണ്ടെന്ന് ദക്ഷിണ കൊറിയയുടെ സയന്സ് ആന്റ് ടെക്നോളജി പോളിസി ഇന്സ്റ്റ്യൂട്ടിലെ ഗവേഷണ വിദ്യാര്ത്ഥി അഭിപ്രായപ്പെട്ടു. വരും വര്ഷങ്ങളില് കൂടുതല് ന്യൂരി റോക്കറ്റുകള് വിക്ഷേപിക്കാനുള്ള പദ്ധതി നടപ്പിലാക്കും. ചന്ദ്രനില് പരിശോധന നടത്താനും സ്പെയ്സ് ലോഞ്ച് വെഹിക്കളുകള്, വമ്പന് ഉപഗ്രഹങ്ങള് തുടങ്ങിയവ നിര്മ്മിക്കാനും പദ്ധതിയുണ്ട്.
Comments