വിവാഹ ദിനത്തിൽ ഭാര്യയ്‌ക്ക് മലയാള ഭാഷയിൽ വാക്കുനൽകി അമേരിക്കൻ വരൻ; മലയാളികളുടെ ഹൃദയം കീഴടക്കി വീഡിയോ

പ്രണയത്തിന് ഭാഷയില്ലെന്ന ചൊല്ല് നാം കേട്ടിരിക്കും. ഭാഷ എന്നത് ആശയവിനിമയം നടത്താനുള്ള ഉപാധികളിൽ ഒന്ന് മാത്രമാണ്. ഇത്തരത്തിൽ ഭാഷയുടെ അതിർവരമ്പുകൾ മറികടന്ന് പ്രണയിച്ച രണ്ടുപേരുടെ വിവാഹമാണ് ഇപ്പോൾ മലയാളികൾക്കിടയിൽ തരംഗമാകുന്നത്.

ആഫ്രിക്കൻ-അമേരിക്കനായ വരനും മലയാളിയായ വധുവും തമ്മിലാണ് വിവാഹം. ജെനോവ ജൂലിയൻ പ്രിയോർ എന്ന യുവതി തന്റെ വിവാഹ ദിനം നടന്ന സംഭവം ഇൻസ്റ്റഗ്രമിലൂടെ പങ്കുവെച്ചപ്പോഴാണ് സംഭവം കേരളത്തിലും ചർച്ചയായത്.

വിവാഹദിനത്തിൽ വധൂവരൻമാർ പരസ്പരം വാക്ക് നൽകുന്ന ഒരു ചടങ്ങുണ്ട്. ഇവിടെ വരനായ ഡാൻസെൽ പ്രിയോർ തന്റെ വധുവിന് മുന്നിൽ നടത്തിയ പ്രതിജ്ഞയാണ് ഏവരെയും അമ്പരപ്പിച്ചത്. ഇംഗ്ലീഷ് ഭാഷയിൽ ആദ്യം പ്രതിജ്ഞയെടുത്ത വരൻ പിന്നീട് മലയാളത്തിൽ സംസാരിക്കാൻ തുടങ്ങുകയായിരുന്നു. ഇതിന്റെ വീഡിയോയാണ് വധുവായ ജെനോവ ജൂലിയൻ ഇൻസ്റ്റഗ്രാമിൽ പങ്കുവെച്ചത്.

ഡാൻസെൽ പ്രിയോർ തന്റെ മൊബൈൽ ഫോൺ എടുക്കുകയും അതിൽ നോക്കി മലയാളം വായിക്കുകയുമായിരുന്നു. ”അയാം ഗോയിങ് ടു സ്പീക്ക് സം മലയാളം ഹിയർ. ഞാൻ എന്റെ ഭാര്യയെ കണ്ടുപിടിച്ചു. എന്റെ നിധിയെ കണ്ടുപിടിച്ചു. എനിക്ക് ഇന്ന് ദൈവത്തിന്റെ അനുഗ്രഹം ലഭിച്ചു, ഞാൻ നിന്നെ സ്‌നേഹിക്കുന്നു.” ഇതായിരുന്നു ഡാൻസെൽ പറഞ്ഞത്.

ഇതുകേട്ട ജെനോവ ജൂലിയൻ ”ഞാനും…” എന്ന് മറുപടി നൽകിയതോടെ വിവാഹത്തിനെത്തിയ എല്ലാവരും ആർത്തുവിളിക്കുകയും കയ്യടിക്കുകയുമായിരുന്നു.

വീഡിയോ പോസ്റ്റ് ചെയ്തത് ഒരു ദിവസം കഴിഞ്ഞപ്പോഴാണ് മലയാളികൾ ഏറ്റെടുത്തത്. കടുകട്ടി ഭാഷയെന്ന് വിശേഷിപ്പിക്കപ്പെടുന്ന മലയാളം വളരെ എളുപ്പത്തിൽ പറയുന്നു. ഇത് കൊള്ളാമല്ലോ എന്നായിരുന്നു പലരുടെയും പ്രതികരണം. മലയാളി എവിടെ ചെന്നാലും മലയാളം പഠിപ്പിക്കുമെന്നും ചിലർ അഭിപ്രായപ്പെട്ടു.

വീഡിയോ ദൃശ്യങ്ങൾ കാണാം..

https://www.instagram.com/p/CfDBoNKpOcY/?utm_source=ig_embed&utm_campaign=embed_video_watch_again