ന്യൂഡൽഹി: രാജ്യത്ത് വീണ്ടും കൊറോണ കേസുകൾ വർധിക്കുന്നു. കഴിഞ്ഞ 24 മണിക്കൂറിനിടെ 11,793 പേർക്കാണ് രോഗം സ്ഥിരീകരിച്ചത്. അതേസമയം ഇന്നലെത്തേക്കാൾ 30.9 ശതമാനം കുറവ് പ്രതിദിനേ രോഗികളാണ് ഇന്ന് രേഖപ്പെടുത്തിയത്. ഏറ്റവും കൂടുതൽ രോഗികൾ റിപ്പോർട്ട് ചെയ്തത് കേരളത്തിലാണ്.
ഇന്നലെ 27 പേരുടെ മരണം കൂടി കൊറോണ മൂലമാണെന്ന് സ്ഥിരീകരിച്ചിട്ടുണ്ട്. ഇതോടെ ആകെ കൊറോണ മരണം 5,25,047 ആയി ഉയർന്നു. 3,03,604 സാമ്പിളുകളാണ് ഇന്നലെ കൊറോണ പരിശോധനയ്‌ക്ക് വിധേയമാക്കിയത്.
കഴിഞ്ഞ 24 മണിക്കൂറിനിടെ റിപ്പോർട്ട് ചെയ്ത 27.19 ശതമാനം കേസുകളും കേരളത്തിൽ നിന്നുള്ളവയാണ്. രോഗവ്യാപനം കൂടുതലുള്ള മറ്റ് സംസ്ഥാനങ്ങൾ മഹാരാഷ്‌ട്ര, തമിഴ്‌നാട്, ഡൽഹി, കർണാടക എന്നിവയാണ്.
അതേസമയം ഇന്നലെ 9,486 പേർ രോഗമുക്തി നേടിയിട്ടുണ്ട്. ഇതോടെ രാജ്യത്ത് കൊറോണ മുക്തി നേടിയവരുടെ എണ്ണം 4.27 കോടിയായി ഉയർന്നു. 98.57 ശതമാനമാണ് രോഗമുക്തി നിരക്ക്.
രാജ്യത്ത് വാക്‌സിനേഷൻ യജ്ഞവും ശക്തമായി പുരോഗമിക്കുകയാണ്. ഇന്നലെ മാത്രം 19 ലക്ഷത്തിലധികം കൊറോണ വാക്‌സിനുകൾ വിതരണം ചെയ്തിരുന്നു. ഇതോടെ രാജ്യത്ത് വിതരണം ചെയ്ത വാക്‌സിൻ ഡോസുകളുടെ എണ്ണം 197 കോടി കവിഞ്ഞു.
