ആകാശത്ത് മാത്രമല്ല… ഇങ്ങ് താഴെ ഭൂമിയിലും ഉണ്ട് മഴവില്ല്. അതും നദിയിൽ…. കേൾക്കുമ്പോൾ അത്ഭുതം തോന്നിയേക്കാം. എന്നാൽ സംഗതി സത്യമാണ്. ഭൂമിയിലും മഴവില്ലുണ്ട്. ലാറ്റിനമേരിക്കൻ രാജ്യമായ കൊളംബിയയിലെ കാനോ ക്രിസ്റ്റൽസ് എന്ന നദിയാണ് മഴവില്ലഴകിൽ നിറഞ്ഞൊഴുകുന്നത്
കൊളംബിയയിലെ മെറ്റാ പ്രവിശ്യയിലെ സെറാനിയ ഡി ലാ മകരേന ദേശീയ ഉദ്യാനത്തിലാണ് റെയിൻ ബോ റിവർ എന്ന് അറിയപ്പെടുന്ന കാനോ ക്രിസ്റ്റൽസ് സ്ഥിതി ചെയ്യുന്നത്. ഗുയബൊറോ നദിയുടെ പോഷകനദിയായ ഇതിന്റെ നീളം 62.1 മൈലാണ് ബഹുവർണ്ണങ്ങൾ കൊണ്ട് സമ്പുഷ്ടമായതിനാൽ അഞ്ച് നിറങ്ങളുള്ള നദിയെന്നും റെയിൻബോ റിവറിന് വിളിപ്പേരുണ്ട്. ചുവപ്പ്, മഞ്ഞ, പച്ച, നീല, പിങ്ക് തുടങ്ങിയ നിറങ്ങളാണ് നദിയിൽ അലിഞ്ഞ് ചേർന്നിരിക്കുന്നത്.
റെയിൻബോ റിവറിലെ ജലസസ്യമാണ് ഈ നിറത്തിന് കാരണമാകുന്നത് എന്നാണ് ശാസ്ത്രലോകത്തിന്റെ കണ്ടെത്തൽ. പോഡോസ്റ്റമേസി കുടുംബത്തിൽപ്പെട്ട മക്കറേനിയ ക്ലാവിഗെറ സപ്ീഷീസ് ആണ് നദിയിൽ നിറഞ്ഞ് വളരുന്നത്. പിങ്ക് ആണ് ഈ ചെടികളുടെ നിറം. വെള്ളത്തിന്റെയും സൂര്യപ്രകാശത്തിന്റെയും സ്വാധീന ഫലമായി ഇത് പല നിറങ്ങളിലായി കാണപ്പെടുന്നു. ജൂൺ മുതൽ ഒക്ടോബർവരെയുള്ള കാലയളവിലാണ് നദി ഏറ്റവും കൂടുതൽ വർണ്ണ ശബളമാകുന്നത്.
ജൂൺ മുതൽ ഒക്ടോബർവരെയുള്ള അഞ്ച് മാസക്കാലമാണ് ഇവിടെ മഴ ലഭിക്കുക. മഴ പെയ്യുമ്പോൾ നദിയിലെ ജലനിരപ്പ് ഉയരുകയും, ഒഴുക്കിന്റെ വേഗത വർദ്ധിക്കുകയും ചെയ്യുന്നു. ഇത് ചെടി തഴച്ചു വളരാൻ കാരണം ആകുന്നു. ഇതോടെ നദിയിലെ നിറങ്ങളും വ്യക്തമായി കാണാൻ സാധിക്കുന്നു. അതുകൊണ്ടുതന്നെ ജൂൺ മുതൽ ഒക്ടോബർവരെയുള്ള കാലങ്ങളിൽ ആണ് ഇവിടം സന്ദർശിക്കാൻ വിനോദസഞ്ചാരികൾ കൂടുതൽ ആയി എത്തുന്നത്.
ഒരുകാലത്ത് കൊളംബിയൻ ഒളിപ്പോരാളികളുടെ സങ്കേതം ആയിരുന്നു ഈ നദിയും ഇതിന്റെ മേഖലയും. അതുകൊണ്ടുതന്നെ ഇവിടേക്ക് പുറത്തു നിന്ന് ആരും എത്തിയിരുന്നില്ല. എന്നാൽ സൈന്യം ഇവരെ തുരത്തിയോടിച്ചതോടെ് ഈ നദിയുടെ മനോഹാരിത ആസ്വദിക്കാൻ മറ്റുള്ളവർക്കും അവസരം ലഭിച്ചു. അതേസമയം ഇങ്ങോട്ടുള്ള വഴി അൽപ്പം ദുർഘടം നിറഞ്ഞതാണ്.
ദിനം പ്രതി നൂറു കണക്കിന് ആളുകൾ ആണ് വർണ്ണാഭമായ ഈ നദി കാണാൻ ഇവിടെ എത്താറുള്ളത്. എന്നാൽ കൊറോണക്കാലത്ത് ഇവിടേക്കുള്ള പ്രവേശനാനുമതി അധികൃതർ നിഷേധിച്ചിരുന്നു. പിന്നീട് കഴിഞ്ഞ വർഷം മദ്ധ്യത്തോടെയാണ് ഇവിടം വിനോദ സഞ്ചാരികൾക്കായി തുറന്ന് നൽകിയത്. കൊറോണയുടെ ഭീതി നിലനിൽക്കുമ്പോഴും ഇവിടേക്കെത്തുന്ന ആളുകളുടെ എണ്ണത്തിൽ കുറവില്ലെന്നാണ് അധികൃതർ പറയുന്നത്.
