ന്യൂഡല്ഹി: രാജ്യത്ത് ഹൈഡ്രജന്റെ ആവശ്യകത 2050 ല് നാലിരട്ടി ആകുമെന്ന് നീതി ആയോഗ് ആന്റ് റോക്കി മൗണ്ടെയ്ന് ഇന്സ്റ്റിയൂട്ടിന്റെ (ആര്എംഐ) റിപ്പോര്ട്ട്. സ്റ്റീല്, ഹെവി ഡ്യൂട്ടി വാഹനങ്ങളുടെ ഗതാഗതം തുടങ്ങിയവയ്ക്കായി ഇതിന്റെ 52 ശതമാനം ഉപയോഗപ്പെടുത്തുമെന്നും റിപ്പോര്ട്ടില് പറയുന്നുണ്ട്. കുറഞ്ഞ തുകയില് വീണ്ടും ഉപയോഗിക്കാനാവുന്ന ഊര്ജ്ജം സൃഷ്ടിക്കുന്ന ഇന്ത്യ ഗ്രീന് ഹൈഡ്രജന് ഉല്പാദകരില് മുന്നിട്ട് നില്ക്കുമെന്നും റിപ്പോര്ട്ടില് പറയുന്നു. ഗ്രേ ഹൈഡ്രജനു സമാന്തരമായ തുകയില് ഗ്രീന് ഹൈഡ്രജന് 2030ഓടേ ലഭ്യമാക്കുമെന്നും റിപ്പോര്ട്ടിലുണ്ട്. 2030-50 കാലഘട്ടത്തില് 3.6 ജിഗാടണ് കാര്ബണ് ഡൈ ഓക്സൈഡ് കുറയ്ക്കാനും സാധിക്കും.
ഹരിത വ്യാവസായിക വിപ്ലവത്തെ ത്വരിതപ്പെടുത്താന് ഗ്രീന് ഹൈഡ്രജനാകും. ഇത് ഇന്ത്യയില് മാത്രമല്ല ലോകത്തില് തന്നെ വിപ്ലവം സൃഷ്ടിക്കുമെന്ന് നീതി ആയോഗ് സിഇഒ അമിതാഭ് കാന്ത് വ്യക്തമാക്കി. ഹൈഡ്രജന്റെ ആവശ്യം വര്ധിക്കുന്നത് വഴി രാജ്യത്തെ വാതക ഇറക്കുമതിയും വര്ദ്ധിക്കും. 83 ശതമാനത്തിലധികം ഊര്ജ്ജം ഉപയോഗിക്കുന്ന വിവിധ മേഖലകളെ കാര്ബണ് രഹിതമാക്കാണമെങ്കില് ഗ്രീന് കാര്ബണ് അനിവാര്യമാണ്. ആകെ ഊര്ജ്ജ ഉപഭോഗത്തിന്റെ 17 ശതമാനം വൈദ്യുതിയും 83 ശതമാനം കല്ക്കരി, ഗ്യാസ്,എണ്ണ ശുദ്ധീകരണ മേഖല,രാസവളം, സ്റ്റീല് ഉല്പാദന മേഖല, ദീര്ഘ ദൂര ഗതാഗതം തുടങ്ങിയവയിലും ഉപയോഗിക്കുന്നു എന്ന് റിപ്പോര്ട്ടില് വ്യക്തമാക്കുന്നു.
ജലകണികയെ വൈദ്യുതിയുടെ സഹായത്തോടെ ഹൈഡ്രജനും ഓക്സിജനും ആക്കി മാറ്റുന്നതിനെയാണ് ഗ്രീന് ഹൈഡ്രജന് എന്നു പറയുന്നത്. വൈദ്യുതവിശ്ലേഷണ പ്രക്രിയ വഴിയാണ് ഇവ നിര്മിക്കുന്നത്.
Comments