ചെന്നൈ: മുടിയും താടിയുമെല്ലാം നീട്ടിയും, പല സ്റ്റൈലിൽ വെട്ടി നിർത്തുന്നതും ഒക്കെയാണ് കൗമാരക്കാർക്കിടയിൽ ഇപ്പോഴത്തെ ട്രെൻഡ്. എന്നാൽ ഇത്തരം ട്രെൻഡുകൾക്ക് തടയിട്ടിരിക്കുകയാണ് ചെന്നൈയിലെ ഒരു സ്കൂൾ അധികൃതർ. ഇതിന്റെ ഭാഗമായി ഫ്രീക്കൻ ലുക്കിലെത്തിയ കുട്ടികളുടെ മുടി സ്കൂൾ അധികൃതർ ഇടപെട്ട് വെട്ടിച്ചിരിക്കുകയാണ്. ബാർബർമാരെ സ്കൂളിലേക്ക് വിളിച്ചു വരുത്തിയാണ് 100ഓളം കുട്ടികളുടെ മുടി വെട്ടിയത്.
തിരുവള്ളൂർ ജില്ലയിലെ ഗുമ്മിഡിപൂണ്ടിയിലെ സർക്കാർ സ്കൂളിലാണ് സംഭവം. മൂവായിരത്തോളം കുട്ടികൾ പഠിക്കുന്ന സ്കൂളാണ് ഇത്. വിദ്യാർത്ഥികളിൽ ചിലർ മുടിയിൽ നടത്തിയ പരീക്ഷണം കണ്ടതോടെയാണ് അധികൃതർ ഇടപെട്ടത്. ഓരോ ക്ലാസുകളിലും മുടി നീട്ടി വളർത്തി ഫ്രീക്ക് ലുക്കിൽ ഇരിക്കുന്നവരെ പ്രധാന അധ്യാപകൻ വിളിച്ചു വരുത്തി. ഇതിന് ശേഷം ഓരോരുത്തരുടേയും രക്ഷിതാക്കളെ വിളിച്ചു പറഞ്ഞതിന് ശേഷമാണ് ബാർബറെ വച്ച് മുടി വെട്ടിച്ചത്.
