എത്ര വയസായി ? വിവാഹ പ്രായം ആയല്ലോ ? എന്തെ ഒന്നും ആയില്ലെ. ഈ ചോദ്യം കേട്ട് മടുത്തവരാവും നിങ്ങൾ. ഒരു പ്രായം കഴിഞ്ഞാൽ സ്ത്രീയാണെങ്കിലും പുരുഷനാണെങ്കിലും വിവാഹ ജീവിതത്തിലേക്ക് കടക്കണം എന്നാണ് നാട്ടുനടപ്പ് . ഈ നാട്ടുനടപ്പിൽ കാലക്രമേണ മാറ്റങ്ങൾ സംഭവിക്കുന്നുണ്ട് . സ്ത്രീ പുരുഷനെയും പുരുഷൻ സ്ത്രീയേയും വിവാഹം കഴിക്കുന്ന രീതികളിൽ നിന്ന് ഒരേ ലിംഗത്തിൽ പെടുന്നവർ വരെ വിവാഹിതരാകുന്ന സന്ദർഭങ്ങളിലേക്ക് കാര്യങ്ങൾ എത്തി നിൽക്കുകയാണ്. ഭരണകൂടം വരെ അതിന് അനുമതിയും നൽകുന്നു. എത്ര ഒക്കെ ആണെങ്കിലും ഈ രീതിയേട് ഒരു എതിർപ്പൊക്കെ നമ്മുടെ നാട്ടിൽ ഇന്നും നിലനിൽക്കുന്നുണ്ട്.
ഒരോ ലിംഗത്തിൽ പെടുന്നവർ വിവാഹിതർ ആകുന്നതിൽ സ്ത്രീ സ്ത്രീയെയോ , പുരുഷൻ പുരുഷനെയോ വിവാഹം ചെയ്യാം .എന്നാൽ സ്ത്രീകൾ സ്ത്രീകളെ വിവാഹം കഴിക്കുന്ന ഒരു നാട് ഉണ്ടെന്ന് നിങ്ങൾക്ക് അറിയുമോ ? അങ്ങനെ ഒരു നാട് ഉണ്ട്. ഇവിടെ സ്ത്രീകൾ സ്ത്രീകളെയാണ് വിവാഹം ചെയ്യുന്നത്. പരസ്പരം തോന്നുന്ന പ്രണയം കൊണ്ടോ , ശരീരിക ആകർഷണം കൊണ്ടോ അല്ല ഈ വിവാഹങ്ങൾ നടക്കുന്നത് . പിന്നെ എന്തുകൊണ്ടെന്നല്ലെ . പറയാം !
ടാൻസാനിയയിലെ ഒരു ഗ്രാമമായ നയംമാങ്കോയിലാണ് ഇത്തരം വിവാഹങ്ങൾ നടക്കുന്നത്. നിംബെൻറോബു എന്ന ആചാരപ്രകാരമാണ് ഗ്രാമത്തിൽ പെണ്ണും പെണ്ണും വിവാഹിതരാകുന്നത്. ഗ്രാമത്തിലെ വിധവകളായ സ്ത്രീകളുടെ ജീവിതം സുരക്ഷിതമാക്കാനാണ് ഗ്രാമം ഇത്തരം വിവാഹങ്ങൾ നടത്തുന്നത് എന്നാണ, ഇത് നടത്തുന്ന ഗോത്രത്തിലെ മുതിർന്നവർ പറയുന്നത്. വിവാഹ ശേഷം സ്ത്രീകൾക്ക് ഒന്നിച്ച് ജീവിക്കാം . ജോലിക്ക് പോവുക, വീട്ടുകാര്യം നോക്കുക, ഇതോക്കെയാണ് ഇവരുടെ കർത്തവ്യങ്ങൾ. ഇതിൽ രസകരമായ ഒന്ന്
വിധവയായ സ്ത്രീക്ക് മുൻ വിവാഹത്തിൽ കുഞ്ഞുങ്ങളില്ലെങ്കിൽ അവർ വിവാഹം കഴിക്കുന്ന പെൺകുട്ടിക്ക് ഏതെങ്കിലും ഒരു പുരുഷനെ ഭർത്താവായി കണ്ടെത്താൻ അനുവാദമുണ്ട്. ഇനി അത്തരത്തിൽ ജനിക്കുന്ന കുഞ്ഞുങ്ങളിൽ ആ പുരുഷന് യാതൊരു അവകാശവും ഇവരുടെ നിയമ പ്രകാരം ഇല്ല. ഈ ഒരു ഇളവ് ദമ്പതികളിലെ പ്രായം കുറഞ്ഞ സ്ത്രീയ്ക്ക് സമൂഹം നൽകിയിരിക്കുന്നതിന് പിന്നിലെ വസ്തുത , രണ്ട് സ്ത്രീകൾ വിവാഹിതരാകുമ്പോൾ കുടുംബത്തിൽ അനന്തരാവകാശികൾ ഉണ്ടാവില്ല എന്നതിനാലാണ്. അനന്തരാവകാശികൾക്ക് വേണ്ടി ഒരു പുരുഷനെ ഭർത്താവായി കണ്ടാലും ആ പുരുഷനൊപ്പം അവൾക്ക് വൈവാഹികബന്ധം ഒരിക്കലും ഉണ്ടാകില്ല. സ്ത്രീകൾ പരസ്പരം വിവാഹം കഴിക്കുന്നുണ്ടെങ്കിലും സ്വവർഗരതി ഇവരുടെ ആചാരത്തിനു വിരുദ്ധവുമാണ്.
ഇവിടെ ശ്രദ്ധേയമാകുന്നത് പരിഷ്കൃതമെന്ന് കരുതുന്ന നാടുകളിൽ സ്വവർഗ്ഗ വിവാഹം ചർച്ചയാകുന്ന കാലത്താണ് ഒരു ഗ്രാമത്തിൽ പെണ്ണും പെണ്ണും വിവാഹിതരാകുന്നത്.ഇതിന് കാരണമായി ചൂണ്ടിക്കാട്ടുന്നത് സ്ത്രീസുരക്ഷയും.
