വിവാഹവുമായി ബന്ധപ്പെട്ട സങ്കൽപ്പങ്ങളെല്ലാം കണ്ടും കേട്ടും മനുഷ്യർ മൂക്കത്ത് വിരൽ വെയ്ക്കുന്ന കാലമാണിത്.നിറങ്ങളോടും വസ്തുക്കളോടും എന്തിന് വേലിയോടു പോലും പ്രണയം തോന്നുകയും വിവാഹം ചെയ്യുകയും ചെയ്യുന്ന കാലമാണിത്.
അങ്ങനെയിരിക്കെ മെക്സിക്കോയിലെ ഒക്സോ എന്ന സ്ഥലത്ത് ഒരു വിവാഹം നടന്നു. ഒക്സോയുടെ മേയറാണ് വിവാഹിതനായത്. വധു ഒരു മനുഷ്യനല്ല എന്നതാണ് ഈ വിവാഹത്തിന്റെ പ്രത്യേകത. മേയർ വിക്ടർ ഹ്യൂഗോ സോസ വധുവായി സ്വീകരിച്ചിരിക്കുന്നത് ഒരു ചീങ്കണ്ണിയെ ആണ്. ചീങ്കണ്ണി കുഞ്ഞിനെ അല്ല. കടിച്ച് കീറി കുടയുന്ന നല്ല അസ്സൽ പെൺ ചീങ്കണ്ണിയെ.Mexico Mayor Wed
ഇവിടുത്തെ ആചാരത്തിന്റെ ഭാഗമായാണ് വിക്ടർ ചീങ്കണ്ണിയെ വിവാഹം ചെയ്തിരിക്കുന്നത്. ഈ ചീങ്കണ്ണിയെ ആകട്ടെ ദൈവത്തിന്റെ പ്രതിനിധി എന്ന നിലയിലാണ് സമുദായക്കാർ കാണുന്നത്. അപ്പോൾ മനുഷ്യരുടെ പ്രതിനിധിയായ മേയറും ചീങ്കണ്ണിയും വിവാഹിതരാകുമ്പോൾ മനുഷ്യരും ദൈവവും ഒന്നിക്കുന്നു എന്നതാണത്രേ സങ്കൽപം.
സാധാരണ വിവാഹം പോലെയാണ് ഇരുവരും വിവാഹിതരായത്. ആഡംബര ചടങ്ങുകളും പരമ്പരാഗതമായ വെളുത്ത വിവാഹ വസ്ത്രവും എല്ലാം മേയറുടെയും ചീങ്കണ്ണിയുടെയും വിവാഹത്തിനുണ്ടായിരുന്നു. വധുവിന് ചുംബനം നൽകുന്നതോടെയാണ് ചടങ്ങ് അവസാനിക്കുക. അതിനാൽ ചീങ്കണ്ണിയുടെ വായ കൂട്ടിക്കെട്ടിയിരുന്നു. എന്തായാലും സമൂഹമാദ്ധ്യമങ്ങളിൽ വലിയ ചർച്ചകൾക്കാണ് ഈ വിവാഹം കാരണമായിരിക്കുന്നത്.
