വാഹന വിൽപ്പനയിൽ മുന്നേറ്റമുണ്ടായതായി ജാപ്പനീസ് വാഹന നിർമാതാക്കളായ നിസാൻ ഇന്ത്യ. 2022 ജൂണിൽ വിറ്റഴിച്ചത് 8,012 വാഹനങ്ങളാണെന്ന് കമ്പനി അറിയിച്ചു. 3,515 യൂണിറ്റുകൾ ഇന്ത്യൻ വിപണിയിൽ വിറ്റഴിച്ചുവെന്നും കയറ്റുമതി നടത്തിയത് 4,497 യൂണിറ്റുകളാണെന്നും കമ്പനി അവകാശപ്പെട്ടതായി ഹിന്ദുസ്ഥാന് ടൈംസ് ഓട്ടോ റിപ്പോര്ട്ട് ചെയ്യുന്നു.
2020 ഡിസംബറിൽ ലോഞ്ച് ചെയ്തതിനു ശേഷം 50,000 യൂണിറ്റുകൾ ഇന്ത്യയിൽ വിതരണം ചെയ്ത മാഗ്നൈറ്റ് കോംപാക്റ്റ് എസ്യുവിയാണ് വില്പനയിൽ മികച്ച പ്രകടനം കാഴ്ചവെച്ച തങ്ങളുടെ വാഹനമെന്ന് നിസാൻ ഇന്ത്യ പറയുന്നു. വിതരണ ശൃംഖലയിലെ പല വെല്ലുവിളികൾക്കിടയിലും കമ്പനിയുടെ വാഹനങ്ങൾ വിറ്റഴിക്കപ്പെട്ടത് സന്തോഷം നൽകുന്നുവെന്ന് നിസ്സാൻ മോട്ടോർ ഇന്ത്യ മാനേജിംഗ് ഡയറക്ടർ രാകേഷ് ശ്രീവാസ്തവ പറഞ്ഞു. ആദ്യ ഘട്ടത്തിൽ തന്നെ 20 ശതമാനം വളർച്ച കമ്പനി കൈവരിച്ചുവെന്നും അദ്ദേഹം പറയുന്നു.
മാഗ്നൈറ്റ് കോംപാക്റ്റ് എസ്യുവിയ്ക്ക് 16,000 -ത്തിലധികം ബുക്കിംഗ് ലഭിച്ചു. മികച്ച പ്രകടനമാണ് മാഗ്നൈറ്റ് കാഴ്ച വെയ്ക്കുന്നത്. വരും മാസങ്ങളിൽ കൂടുതൽ വിറ്റ് വരവ് ഉണ്ടാകുമെന്നാണ് കമ്പനി വിശ്വസിക്കുന്നത്. വരുമാനം വർദ്ധിപ്പിക്കുന്നതിനുള്ള ശ്രമത്തിന്റെ ഭാഗമായി നിസ്സാൻ ഇന്ത്യ ഒരു സബ്സ്ക്രിപ്ഷൻ പ്ലാൻ വാഗ്ദാനം ചെയ്യുന്നുവെന്ന് കമ്പനി പറയുന്നു. പുതിയ പ്ലാനിലൂടെ വൈറ്റ് പ്ലേറ്റ് ഉള്ള വാഹനം സ്വന്തമാക്കാൻ സാധിക്കും. ഒപ്പം ഡൽഹി എൻസിആർ, മുംബൈ, പൂനെ, ബാംഗ്ലൂർ, ഹൈദരാബാദ്, ചെന്നൈ എന്നി നഗരങ്ങളിൽ ‘ബൈ ബാക്ക്’ ഓപ്ഷനും ഉപഭോക്താക്കൾക്ക് നൽകാൻ കഴിയും.
