ആരാധകർക്ക് സന്തോഷ വാർത്തയുമായി എത്തിയിരിക്കുകയാണ് സ്വീഡിഷ് വാഹന നിര്മ്മാതാക്കളായ വോൾവോ കാർസ്. ഇന്ത്യയിലെ തങ്ങളുടെ ആദ്യത്തെ ഇലക്ട്രിക് കാർ പുറത്തിറക്കാൻ ഒരുങ്ങുകയാണ് കമ്പനി. XC40 റീചാർജ് എസ്യുവിയാണ് കമ്പനി അവതരിപ്പിക്കുന്നത്. വാഹനത്തിന്റെ ലോഞ്ച് ജൂലൈ 26 ന് നടക്കുമെന്ന് കമ്പനി പറയുന്നു. കഴിഞ്ഞ വർഷം വാഹനം ലോഞ്ച് ചെയ്യാനായിരുന്നു കമ്പനി തീരുമാനിച്ചിരുന്നത്. എന്നാൽ കൊറോണ വ്യാപനം മൂലം മാറ്റി വെയ്ക്കകയായിരുന്നു.
സ്വീഡിഷ് കാർ നിർമ്മാതാക്കൾ പറയുന്നതനുസരിച്ച് XC40 റീചാർജ് ഇലക്ട്രിക് എസ്യുവികൾ കർണാടകയിലെ ബെംഗളൂരുവിനടുത്തുള്ള കമ്പനിയുടെ ഹൊസകോട്ട് പ്ലാന്റിൽ പ്രാദേശികമായി നിർമ്മിക്കും. ഇതോടെ വോൾവോ XC40 റീചാർജ് എസ്യുവിയുടെ വിലയിൽ കുറവ് ഉണ്ടാകുമെന്നും ഇവർ അറിയിക്കുന്നു. ഈ മാസം അവസാനത്തോടെ വാഹനത്തിനായുള്ള ബുക്കിംഗ് ആരംഭിക്കുമെന്നുമാണ് പുറത്ത് വരുന്ന വിവരങ്ങൾ. ബുക്കിംഗിന് പിന്നാലെ വരുന്ന ഉത്സവ സീസണുകളിൽ വിറ്റഴിക്കാനുമാണ് കമ്പനി തീരുമാനിച്ചിരിക്കുന്നത്. കിയ ഇവി6 പോലുള്ള വിപണിയിലെ മറ്റ് പ്രീമിയം ഇലക്ട്രിക് കാറുകൾക്ക് വോൾവോ XC40 റീചാർജ് എസ്യുവി കടുത്ത എതിരാളി ആകുമെന്ന് ഉറപ്പാണ്.
XC40 റീചാർജ് ഇലക്ട്രിക് എസ്യുവിയിൽ 78kWh ലിഥിയം-അയൺ ബാറ്ററി പായ്ക്കാണ് ഘടിപ്പിച്ചിരിക്കുന്നത്. ഒറ്റ ചാർജിൽ ഏകദേശം 400 കിലോമീറ്റർ റേഞ്ച് നൽകാൻ കഴിയുമെന്നും 150kW DC ഫാസ്റ്റ് ചാർജർ ഉപയോഗിച്ച് 40 മിനിറ്റിനുള്ളിൽ 0 മുതൽ 80 ശതമാനം വരെ ചാർജ് വർദ്ധിപ്പിക്കാമെന്നും വോൾവോ അവകാശപ്പെടുന്നു. ഇലക്ട്രിക് എസ്യുവിക്ക് 408 എച്ച്പി പരമാവധി കരുത്തും 660 എൻഎം പീക്ക് ടോർക്കും സൃഷ്ടിക്കാന് സാധിക്കും. ആഗോള വിപണിയിൽ വിൽക്കുന്ന അതേ വോൾവോ XC40 റീചാർജ് ഇലക്ട്രിക് എസ്യുവി തന്നെയായിരിക്കും ഇന്ത്യയിലും നിർമ്മിക്കാൻ പോകുന്നത്.
