ന്യൂഡൽഹി: പി.ടി ഉഷയ്ക്ക് പുറമേ രാജ്യസഭയിലേക്ക് നാമനിർദ്ദേശം ചെയ്യപ്പെട്ട് പ്രശസ്ത സംഗീത സംവിധായകൻ ഇളയരാജയും. പ്രധാനമന്ത്രി നരേന്ദ്രമോദിയാണ് ഇളയരാജയുടെയും മറ്റ് രണ്ട് പേരുടെയും പേരുകൾ പുറത്തുവിട്ടത്. ഇവർക്ക് പ്രധാനമന്ത്രി ട്വിറ്ററിലൂടെ അഭിനന്ദനങ്ങൾ നേരുകയും ചെയ്തു. ഇളയാരജയ്ക്ക് പുറമേ സാമൂഹ്യസേവകൻ വീരേന്ദ്ര ഹെഗ്ഡേ, സംവിധായകനും തിരക്കഥാകൃത്തുമായ വിജയേന്ദ്ര പ്രസാദ് എന്നിവരെയാണ് ബിജെപി രാജ്യസഭാ സ്ഥാനാർത്ഥികളായി നാമനിർദ്ദേശം ചെയ്തത്.
സർഗ്ഗാത്മകതകൊണ്ട് പല തലമുറകളിലുള്ള ആളുകളെ ത്രസിപ്പിച്ച ദിവ്യപുരുഷനാണ് ഇളയരാജയെന്ന് പ്രധാനമന്ത്രി ട്വിറ്ററിൽ കുറിച്ചു. പല വികാരങ്ങളെയും അദ്ദേഹത്തിന്റെ ഗാനങ്ങളിൽ ഭംഗിയായി പ്രതിഫലിക്കും. തീർത്തും താഴെക്കിടയിൽ നിന്നും ഉയർന്നുവന്ന് വലിയ ഉയരങ്ങൾ കീഴടക്കിയ വ്യക്തിയാണ് അദ്ദേഹം. രാജ്യസഭയിലേക്ക് അദ്ദേഹം നാമനിർദ്ദേശം ചെയ്യപ്പെട്ടതിൽ അതിയായ സന്തോഷമുണ്ടെന്നും പ്രധാനമന്ത്രി ട്വീറ്റ് ചെയ്തു.
ദശകങ്ങളായി സർഗ്ഗാത്മക ലോകവുമായി ബന്ധപ്പെട്ട് കിടക്കുന്ന വ്യക്തിയാണ് വി. വിജയേന്ദ്ര പ്രസാദ് ഗാരു. ഇന്ത്യയുടെ സംസ്കാരം ഉൾക്കൊളളുന്നതാണ് അദ്ദേഹത്തിന്റെ ഓരോ സിനിമയും. അതുകൊണ്ടുതന്നെ ഓരോ സിനിമയും ആഗോളതലത്തിൽ ശ്രദ്ധപിടിച്ചു പറ്റും. രാജ്യസഭയിലേക്ക് നാമനിർദ്ദേശം ചെയ്യപ്പെട്ട അദ്ദേഹത്തിന് അഭിനന്ദനങ്ങളെന്നും പ്രധാനമന്ത്രി പറഞ്ഞു.
പഴയ അനുഭവം ഓർത്തെടുത്താണ് സാമൂഹ്യസേവകൻ വീരേന്ദ്ര ഹെഗാഡേയെ പ്രധാനമന്ത്രി അഭിനന്ദിച്ചത്. ഒരിക്കൽ ധർമ്മശാല ക്ഷേത്രം സന്ദർശിക്കാനുള്ള അവസരം ലഭിച്ചപ്പോൾ ആരോഗ്യം, വിദ്യാഭ്യാസം, സംസ്കാരം തുടങ്ങിയ മേഖലകളിൽ ഹെഗാഡേ വഹിച്ച പങ്കിനെക്കുറിച്ച് നേരിട്ടറിയാൻ സാധിച്ചെന്ന് പ്രധാനമന്ത്രി പറഞ്ഞു. പാർലമെന്റിന്റെ പ്രവർത്തനങ്ങളെ അദ്ദേഹം തന്റെ കഴിവിനാൽ സമ്പന്നമാകുമെന്നും പ്രധാനമന്ത്രി കൂട്ടിച്ചേർത്തു.
Comments