വില്പനയിൽ വളർച്ച രേഖപ്പെടുത്തിയതായി ബിഎംഡബ്ല്യു ഗ്രൂപ്പ് ഇന്ത്യ. 2022 ജനുവരി മുതൽ ജൂൺ വരെയുള്ള കാലയളവിൽ 5,570 കാറുകളും 3,114 മോട്ടോർസൈക്കിളുകളും വിതരണം ചെയ്തുകൊണ്ട് ബിഎംഡബ്ല്യു ഗ്രൂപ്പ് ഇന്ത്യ എക്കാലത്തെയും മികച്ച അർദ്ധവാർഷിക വില്പനാ പ്രകടനം രേഖപ്പെടുത്തിയെന്ന് കമ്പനി പറഞ്ഞു.
എല്ലാ പ്രതിബന്ധങ്ങൾക്കും എതിരെ ബിഎംഡബ്ല്യു ഗ്രൂപ്പ് ഇന്ത്യയിൽ ദ്രുതഗതിയിൽ സ്ഥിരതയുള്ള മുന്നേറ്റം കാഴ്ച വെയ്ക്കുന്നുവെന്ന് ബിഎംഡബ്ല്യു ഗ്രൂപ്പ് ഇന്ത്യ പ്രസിഡന്റ് വിക്രം പവ പറഞ്ഞു. ആഭ്യന്തര, അന്തർദേശീയ വിപണിയിലെ വിവിധ ഘടകങ്ങൾ മൂലമുണ്ടാകുന്ന പ്രശ്നങ്ങൾക്കിയിലും ബിഎംഡബ്ല്യു, മിനി, ബിഎംഡബ്ല്യു മോട്ടോറാഡ് എന്നിവയുടെ മികച്ച വില്പനാ പ്രകടനം സന്തോഷം നൽകുന്നതാണെന്നും അദ്ദേഹം കൂട്ടിച്ചേർത്തു.
കമ്പനിയുടെ വളർച്ച ഇന്ത്യയിലെ ആഡംബര കാർ, പ്രീമിയം മോട്ടോർസൈക്കിൾ വിഭാഗത്തിൽ ബിഎംഡബ്ല്യു ഗ്രൂപ്പിന്റെ ഉത്പന്നങ്ങൾക്കുള്ള വലിയ സ്വീകാര്യതയാണ് തെളിയിക്കുന്നത്. അതിനാൽ തങ്ങൾ വിപണിയോട് പൂർണ്ണമായും പ്രതിജ്ഞാബദ്ധരാണെന്നും ആസൂത്രണം ചെയ്തതുപോലെ തന്നെ വാഹനങ്ങൾ നിർമ്മിക്കുകയും വിതരണം ചെയ്യുകയും ചെയ്യുന്നുവെന്നും കമ്പനി പറഞ്ഞു. അതിനാൽ തന്നെ ഭൂരിഭാഗം ഉത്പ്പന്നങ്ങളും വിറ്റഴിക്കപ്പെട്ടു. ഓർഡർ ബുക്കുകൾ നിലവിൽ നിറഞ്ഞിരിക്കുകയാണ്. വരും മാസങ്ങളിലേയ്ക്കുള്ള ബുക്കിംഗ് നിര വളരെ വലുതാണെന്നും ബിഎംഡബ്ല്യു ഗ്രൂപ്പ് ഇന്ത്യ വ്യക്തമാക്കി.
BMW X1, BMW X3, BMW X4, BMW X5, BMW X7 എന്നിവയുൾപ്പെടെ പ്രാദേശികമായി നിർമ്മിച്ച സ്പോർട്സ് ആക്റ്റിവിറ്റി വെഹിക്കിൾ (SAV) ശ്രേണിയിൽ നിന്ന് ഏകദേശം 50% ബിഎംഡബ്ല്യു ഇന്ത്യൻ വിപണിയിൽ വിറ്റഴിക്കപ്പെട്ടിട്ടുണ്ട്. കഴിഞ്ഞ വർഷം ഇതേ കാലയളവിനെ അപേക്ഷിച്ച് MINI ഇന്ത്യ 50% വളർച്ച കൈവരിച്ചു. പ്രാദേശികമായി നിർമ്മിച്ച MINI കൺട്രിമാൻ വിൽപ്പനയിൽ 45%-ത്തിലധികം വിഹിതം നേടി.ബിഎംഡബ്ല്യു മോട്ടോറാഡ് ഇന്ത്യ 56.7% വളർച്ച നേടി. ബിഎംഡബ്ല്യു ജി 310 ആർ, ബിഎംഡബ്ല്യു ജി 310 ജിഎസ് എന്നിവ രണ്ടുംകൂടെ ഏകദേശം 90% വിഹിതം നേടി.
