തൃശൂർ : പോക്സോ കേസിൽ അറസ്റ്റിലായ നടൻ ശ്രീജിത്ത് രവി കുറ്റസമ്മതം നടത്തി. തനിക്ക് ഒരു രോഗമുണ്ടെന്നും ഇത്തരത്തിൽ നഗ്നതാ പ്രദർശനം നടത്താനുള്ള കാരണം അതാണെന്നും നടൻ പോലീസിനോട് പറഞ്ഞു. മരുന്ന് കഴിക്കാത്തത് കൊണ്ടാണ് ബുദ്ധിമുട്ട് അനുഭവപ്പെടുന്നത് എന്നാണ് ശ്രീജിത്തിന്റെ മൊഴി. ഇതിന് ഇരയായ കുട്ടികളെയും ശ്രീജിത്ത് തിരിച്ചറിഞ്ഞിട്ടുണ്ട്.
കഴിഞ്ഞ നാലാം തീയ്യതി വൈകീട്ട് 3.30 ഓടെയായിരുന്നു സംഭവം. അയ്യന്തോൾ എസ് എൻ പാർക്കിനടുത്ത് വെച്ച് പതിനൊന്നും അഞ്ചും വയസ്സുള്ള കുട്ടികൾക്ക് നേരെയാണ് ഇയാൾ നഗ്നതാ പ്രദർശനം നടത്തിയത്. ശേഷം ശ്രീജിത്ത് ഇവിടെ നിന്ന് കാറിൽ കടന്നുകളഞ്ഞു.
കുട്ടികൾക്ക് ആദ്യം ആളെ മനസ്സിലായില്ല. വീട്ടിലെത്തിയ കുട്ടികൾ മാതാപിതാക്കളെ വിവരം അറിയിക്കുകയും പിന്നീട് പോലീസിൽ പരാതി നൽകുകയും ചെയ്തു. കറുത്ത സഫാരി കാറിൽ എത്തിയ ആളാണ് നഗ്നതാ പ്രദർശനം നടത്തിയത് എന്നാണ് കുട്ടികൾ പോലീസിനോട് പറഞ്ഞത്. ഇത് കേന്ദ്രീകരിച്ച് നടത്തിയ അന്വേഷണത്തിൽ സിസിടിവി ദൃശ്യങ്ങളിൽ നിന്നാണ് ശ്രീജിത്തിന്റെ വാഹനമാണെന്ന് തിരിച്ചറിഞ്ഞത്.
ഇന്ന് രാവിലെയോടെ ശ്രീജിത്തിനെ പോലീസ് അറസ്റ്റ് ചെയ്തു. കുറ്റസമ്മതം നടത്തിയ പ്രതിയെ കോടതിയിൽ ഹാജരാക്കും. നേരത്തെയും സമാനമായ കേസിൽ ശ്രീജിത്തിനെ പോലീസ് അറസ്റ്റ് ചെയ്തിരുന്നു. പാലക്കാട് പത്തിരിപ്പാലയിലെ സ്കൂൾ വിദ്യാർത്ഥികൾക്ക് നേരെ നഗ്നതാപ്രദർശനം നടത്തിയതിനാണ് ഇയാൾ അറസ്റ്റിലായത്.
