ന്യൂഡൽഹി: ടിബറ്റിന്റെ ആചാര്യൻ ദാലായ് ലാമയോടുള്ള വെറുപ്പ് ഇന്ത്യക്കെതിരെ പ്രകടിപ്പിച്ച് വീണ്ടും ചൈന. ദാലായ് ലാമയുടെ 87-ാം ജന്മദിനത്തിന് പ്രധാനമന്ത്രി നരേന്ദ്ര മോദി ആശംസകൾ അർപ്പിച്ചതിനെതിരെ രൂക്ഷ വിമർശനം നടത്തിയ ചൈനയ്ക്ക് ഇന്ത്യൻ വിദേശകാര്യമന്ത്രാലയം ചുട്ടമറുപടിയാണ് നൽകിയത്.
ഇന്ത്യയുടെ ഏറെ ബഹുമാനിക്കപ്പെടുന്ന അതിഥിയാണ് ബുദ്ധമതാചാര്യൻ ദലായ് ലാമ. അതിഥിയെ എങ്ങനെ ബഹുമാനിക്കണമെന്ന് ആരും തങ്ങളെ പഠിപ്പിക്കേണ്ടെന്ന് വിദേശ കാര്യ വക്താവ് അരിന്ദം ബാഗ്ചി പറഞ്ഞു. ചൈനയുടെ വിദേശകാര്യ വക്താവ് സാവോ ലിജിയാനാണ് ദലായ് ലാമയേയും ഇന്ത്യയുടെ ടിബറ്റിനെ മുൻനിർത്തിയുള്ള ചൈനാ വിരുദ്ധ നയത്തേയും വിമർശിച്ചത്. ദലായ് ലാമയ്ക്ക് ആശംസകൾ അർപ്പിച്ച അമേരിക്കൻ വിദേശ കാര്യ സെക്രട്ടറി ആന്റണി ബ്ലിങ്കനേയും ലിജിയാൻ വിമർശിച്ചു.
പ്രധാനമന്ത്രി നരേന്ദ്രമോദി കഴിഞ്ഞവർഷവും ദലായ് ലാമയ്ക്ക് ആശംസകൾ നേരുകയും സുഖവിവരങ്ങൾ അന്വേഷിക്കുകയും ചെയ്തിരുന്നു. ലോകംമുഴുവൻ വളരെയധികം ശിഷ്യഗണങ്ങളുള്ള ആചാര്യനാണ് ദലായ് ലാമ. അദ്ദേഹത്തിന്റെ ജന്മദിനം ഇന്ത്യയിലും പുറത്തും ലക്ഷക്കണക്കിന് പേരാണ് ആഘോഷിക്കുന്നതെന്നും ബാഗ്ചി പറഞ്ഞു.
Comments