കാളിദാസ് ജയറാമിന്റെ പുതിയ ചിത്രമായ ‘നച്ചത്തിരം നഗർഗിരത്തിന്റെ’ ക്യാരക്ടർ പോസ്റ്റർ പുറത്തിറങ്ങിയിരിക്കുകയാണ്. പാ രഞ്ജിത്ത് സംവിധാനം ചെയ്യുന്ന ചിത്രത്തിൽ കാളിദാസ് പ്രധാന വേഷമാണ് ചെയ്യുന്നത്. ചിത്രത്തിന്റെ ക്യാരക്ടർ പോസ്റ്റർ പങ്കുവെച്ച് അച്ഛനായ ജയറാം പറഞ്ഞ വാക്കുകളാണ് ഇതിനിടെ ശ്രദ്ധനേടുന്നത്..
കരിയറിലെ ഏറ്റവും വലിയ ഭാഗ്യത്തെക്കുറിച്ചാണ് പോസ്റ്റർ പങ്കുവെച്ച ജയറാം സംസാരിക്കുന്നത്. നല്ല സിനിമയുടെ ഭാഗമാകാൻ പറ്റുന്നതാണ് കരിയറിലെ ഏറ്റവും വലിയ ഭാഗ്യമെന്ന് കാളിദാസിനോട് ജയറാം പറയുന്നു. മകന്റെ പുതിയ ചിത്രത്തിന് എല്ലാവിധ ആശംസകൾ നേരുന്നതായും അദ്ദേഹം അറിയിച്ചു. ഫേസ്ബുക്ക് പോസ്റ്റിലൂടെയായിരുന്നു അദ്ദേഹത്തിന്റെ പ്രതികരണം.
ചുരുക്കം ചില ചിത്രങ്ങളിൽ മാത്രമേ അഭിനയിച്ചിട്ടൂള്ളൂവെങ്കിലും തന്റെ കുട്ടികാലം മുതൽക്കെ മലയാളികൾക്കിടയിൽ പ്രിയങ്കരനായി മാറിയ താരപുത്രനാണ് കാളിദാസ് ജയറാം. കൊച്ചുകൊച്ചു സന്തോഷങ്ങൾ മുതൽ ഏറ്റവുമൊടുവിലായി എത്തിയ വിക്രം എന്ന കമൽഹാസൻ ചിത്രം വരെ, വേഷമിട്ട എല്ലാ ചിത്രത്തിലും തന്റേതായ മുഖമുദ്ര പതിപ്പിക്കാൻ കാളിദാസിന് കഴിഞ്ഞിട്ടുണ്ട്.
ഇപ്പോഴിതാ പാ രഞ്ജിത്ത് സംവിധാനം ചെയ്യുന്ന ‘നച്ചത്തിരം നഗർഗിരത്ത്’ എന്ന തമിഴ് സിനിമയാണ് കാളിദാസിന്റെ ആരാധകർ കാത്തിരിക്കുന്ന അടുത്ത ചിത്രം. ദുഷാര വിജയൻ പ്രധാനവേഷത്തിലെത്തുന്ന ഈ ചിത്രം നവംബറിൽ റിലീസിനെത്തുമെന്നാണ് റിപ്പോർട്ടുകൾ.
