മധുരവും പുളിയും ഇടകലർന്ന രുചി പകരുന്ന ‘വാളൻപുളി’ മലയാളികൾക്ക് ഒഴിവാക്കാനാകാത്ത ഒന്നാണ്. ചമ്മന്തി അരയ്ക്കുമ്പോൾ മുതൽ സാമ്പാർ തയ്യാറാക്കുമ്പോൾ വരെ വാളൻപുളിയെ മിക്കവരും ആശ്രയിക്കാറുണ്ട്. ചിലർ മീൻകറി പാകം ചെയ്യുമ്പോൾ കുടംപുളിക്ക് പകരമായി വാളൻപുളി ഉപയോഗിക്കുന്നു. ഇന്ത്യൻ ഭക്ഷണരീതികളിൽ ഒട്ടുമിക്ക വിഭവങ്ങളിലും പുളിയുടെ സാന്നിധ്യമുണ്ടാകാറുണ്ടെന്നതാണ് പ്രത്യേകത.
ഭക്ഷ്യ വിഭവങ്ങളെ രുചികരമാക്കുക എന്ന് മാത്രമല്ല, മറ്റ് ചില സവിശേഷകതകളും പുളിക്കുണ്ട്. വിവിധതരം പ്രോട്ടീനുകൾ, ഫൈബർ, വിറ്റാമിൻ ബി1, ബി3, പൊട്ടാസ്യം എന്നിവയ്ക്കൊപ്പം ഉയർന്ന കാർബോഹൈഡ്രേറ്റും വാളൻപുളിയിൽ അടങ്ങിയിട്ടുണ്ട്.
കാർബോഹൈഡ്രേറ്റിനോടൊപ്പം പഞ്ചസാരയുടെ അളവും പുളിയിൽ ഉള്ളതിനാൽ പ്രമേഹ രോഗികൾ കുറഞ്ഞ അളവിൽ മാത്രം പുളി ഉപയോഗിക്കണമെന്നാണ് ആരോഗ്യവിദഗ്ധർ നിർദേശിക്കാറുള്ളത്. മറിച്ച് പ്രമേഹരോഗമില്ലാത്തയാളുകൾക്ക് ദൈനംദിന ജീവിതത്തിൽ വാളൻപുളി ഏറെ സഹായകരമാകുമെന്നാണ് കണ്ടെത്തൽ.
പുളിയുടെ ഗുണങ്ങൾ:
ശരീരഭാരം കുറയ്ക്കുന്നു: കാർബോഹൈഡ്രേറ്റും പഞ്ചസാരയും അടങ്ങിയിട്ടുണ്ടെങ്കിലും പുളിയിൽ കൊഴുപ്പിന്റെ അംശമില്ല. കൂടാതെ പുളിയിൽ അടങ്ങിയിട്ടുള്ള ഫ്ളേവനോയ്ഡുകളും പോളിഫെനോളുകളും ശരീരഭാരം കുറയ്ക്കാൻ സഹായിക്കുന്നു. ഇതിലുള്ള എൻസൈം എന്ന ഘടകം വിശപ്പ് നിയന്ത്രിക്കുകയും ചെയ്യുന്നു. ഇതുവഴി ശരീരഭാരം നിയന്ത്രിക്കാൻ വാളൻപുളി സഹായിക്കുന്നു.
ദഹനം: വയറിലെ പേശികളെ ശക്തിപ്പെടുത്താൻ പുളിക്ക് കഴിയും. അതിനാൽ വയറിളക്കത്തിനുള്ള മികച്ച പ്രതിവിധി കൂടിയാണ് വാളൻപുളി. ദഹനപ്രശ്നങ്ങളെ ഒരുപരിധിവരെ സുഗമമാക്കാൻ പുളിക്ക് സാധിക്കും.
ഹൃദയത്തിന്റെ ആരോഗ്യം: പുളിയിലെ ഫ്ളേവനോയ്ഡുകൾ ചീത്ത കൊളസ്ട്രോളിന്റെ (എൽഡിഎൽ) അളവ് കുറയ്ക്കാനും നല്ല കൊളസ്ട്രോളിന്റെ (എച്ച്ഡിഎൽ) അളവ് വർദ്ധിപ്പിക്കാനും സഹായിക്കുന്നു. അതുവഴി ധമനികളിൽ കൊഴുപ്പ് അടിഞ്ഞുകൂടാനുള്ള സാധ്യത തടയപ്പെടുന്നു. പുളിയിലടങ്ങിയിട്ടുള്ള പൊട്ടാസ്യം എന്ന ഘടകം ഹൈപ്പർടെൻഷൻ നിയന്ത്രിക്കാനും സഹായിക്കുന്നു. ഇതുവഴി ആരോഗ്യമുള്ള ഹൃദയത്തെ പരിപാലിക്കാൻ പുളിക്ക് കഴിയുന്നു.
പെപ്റ്റിക് അൾസർ: ചെറുകുടലിന്റെയും ആമാശയത്തിന്റെയും ആന്തരിക പാളിയിൽ രൂപപ്പെടുന്ന ഒന്നാണ് പെപ്റ്റിക് അൾസർ. ഇത് വരുന്നവർക്ക് വയറുവേദനയുണ്ടാകുകയും ഭക്ഷണം ശരിയായി ദഹിപ്പിക്കാൻ കഴിയാതിരിക്കുകയും ചെയ്യാറുണ്ട്. വാളൻപുളിയുടെ സാന്നിധ്യം ഇത്തരത്തിൽ രൂപപ്പെടുന്ന അൾസറുകളെ ചെറുക്കാൻ സഹായിക്കുമെന്നാണ് കണ്ടെത്തൽ.
കരൾ: കരളിനെ പരിപാലിക്കാൻ പുളിക്ക് കഴിയുമെന്നാണ് പറയപ്പെടുന്നത്. പതിവ് ഭക്ഷണത്തിൽ പുളി ഉൾപ്പെടുത്തിയാൽ കരളിൽ കൊഴുപ്പ് അടിയുന്നത് ഒഴിവാകുന്നു.
അതേസമയം ഭക്ഷണത്തിൽ പുളിയുടെ അളവ് അനിയന്ത്രിതമായാലും പ്രശ്നങ്ങൾ സൃഷ്ടിച്ചേക്കാം. അതിനാൽ ആരോഗ്യവിദഗ്ധരുടെ ശുപാർശകൾക്ക് അനുസൃതമായി മാത്രം ആഹാരത്തിൽ ഉൾപ്പെടുത്തുന്ന പുളിയുടെ അളവ് തീരുമാനിക്കുക.
