പണം സമ്പാദിക്കണം,അല്ലലില്ലാതെ ജീവിക്കണം, ഏതൊരു മനുഷ്യനും ആഗ്രഹിക്കുന്ന കാര്യങ്ങളാണിവ. നല്ല ജീവിതത്തിനായി കഠിനമായി അദ്ധ്വാനിച്ച് പണുണ്ടാക്കുന്നു. ചിലരാകട്ടെ കുറുക്കുവഴികളിലൂടെ എളുപ്പം പണക്കാരനാകാൻ ശ്രമിക്കുന്നു. അത്തരമൊരു കുറുക്കുവഴി കണ്ടെത്തിയ ഒരു യുവാവ് ഏവരെയും അമ്പരപ്പിച്ചിരിക്കുകയാണ്.
ടിക്ക്ടോക്കിൽ അത്യാവശ്യം ഫോളോവേഴ്സ് ഒക്കെയായി കുറച്ച് വരുമാനമൊക്കെ ലഭിച്ച് തട്ടിമുട്ടി ജീവിച്ച് പോന്നയാളാണ് കേംബ്രിഡ്ജ് സ്വദേശിയായ ജോർജ് വുഡ് വിൻ. എന്നാൽ ഇങ്ങനെ ജീവിക്കേണ്ടവനേ അല്ല താൻ എന്ന് ഒരിക്കൽ ജോർജിന് തോന്നി. അതിനായി പല വഴികൾ ആലോചിച്ചു. ആ ഇടയ്ക്കാണ് ജോർജ്ജ് തന്റെ മുത്തശ്ശന്റെയും മുത്തശ്ശിയുടേയും അടുത്തേക്ക് പോയത്. ചെരുപ്പ് ഉപയോഗിക്കുന്നതേക്കാൾ നല്ലതാണ് നഗ്നപാദനായി നടക്കുന്നതെന്ന മുതിർന്നവരുടെ നിർദ്ദേശം ജോർജ്ജിന് നന്നേ ബോധിച്ചു.
അങ്ങനെയവൻ ചെരുപ്പുകൾ ഉപേക്ഷിച്ച് നടക്കാൻ തുടങ്ങി. എന്തും ഏതും സമൂഹമാദ്ധ്യമങ്ങളിൽ പങ്കുവെക്കുന്ന ജോർജ് താൻ ചെരുപ്പ് ഉപേക്ഷിച്ച കാര്യവും പങ്കുവെച്ചു. ഇതറിഞ്ഞ ‘ജോർജിന്റെ ഫാൻസിന്’ ചെരുപ്പില്ലാതെ നടന്ന് കഴിഞ്ഞപ്പോൾ കാലിന്റെ അവസ്ഥ എന്തായി എന്ന് അറിഞ്ഞാൽ കൊള്ളാമെന്നായി. ജോർജ് ഒട്ടും മടിക്കാതെ തന്റെ മുഷിഞ്ഞ കാലുകളുടെ ചിത്രം പങ്ക് വെച്ചു.
പിന്നെ ഇടയ്ക്കിടെ ഇത് ഒരു പതിവാക്കി. കാലുകളുടെ ഇത്തരത്തിലുള്ള ചിത്രങ്ങൾ പങ്കുവെക്കുവാൻ മാത്രം അദ്ദേഹം ഒരു അക്കൗണ്ട് നിർമ്മിച്ചു. വേഗത്തിൽ കോടിശ്വരനാവാൻ ഇത് തന്നെ വഴിയെന്ന് ഉറപ്പിച്ച ജോർജ് പിന്നീട് നിരന്തരം തന്റെ നഗ്നപാദങ്ങളുടെ ഫോട്ടോകൾ ഇട്ടു. മരംകോച്ചുന്ന തണുപ്പിലും കൊടും ചൂടിലും അവൻ നഗ്നപാദനായി തന്നെ നടന്നു നീങ്ങി. ആദ്യം ഏറെ ബുദ്ധിമുട്ടികൾ അനുഭവിക്കേണ്ടി വന്നെങ്കിലും ഇപ്പോൾ അവന്റെ കാലുകൾ കാലാവസ്ഥയോട് പൊരുതുന്ന തരത്തിലേക്ക് എത്തി. ഫോട്ടോകൾ പങ്ക് വെയ്ക്കുന്നതിലൂടെ പ്രതീക്ഷിക്കുന്ന വരുമാനം ലഭിക്കുന്നില്ലെങ്കിലും അഞ്ചാറ് വർഷങ്ങൾക്കുള്ളിൽ തന്റെ ഈ മുഷിഞ്ഞ കാലുകൾ ഉപയോഗിച്ച് കോടീശ്വരനാവുമെന്ന ഉറച്ച വിശ്വാസത്തിലാണ് ജോർജ്.
