ഹോട്ടലുകളിലെ ഭക്ഷണം മലയാളിക്കിന്ന് ശീലമായിരിക്കുകയാണ്. മലയാളിയുടെ ഭക്ഷണ ശീലങ്ങളിൽ ഇന്ന് വലിയ മാറ്റമാണ് ഉണ്ടായിരിക്കുന്നത്. ചൈനീസ് അറേബ്യൻ ഭക്ഷണങ്ങൾ ഇപ്പോൾ സാധാരണമായിരിക്കുകയാണ്. ഗ്രിൽ ചെയ്ത മാംസാഹാരങ്ങളാണ് ഇപ്പോൾ കൂടുതൽ. എങ്കിലും വറുത്തതും പൊരിച്ചതുമായ ഭക്ഷണങ്ങൾ മലയാളിക്ക് ഇന്നും ഏറെ പ്രിയപ്പെട്ടതു തന്നെ.
ഭക്ഷണ സാധനങ്ങൾ എങ്ങനെ വറുക്കണം എന്നതിന് ചില നിർദ്ദേശങ്ങൾ നൽകിയിരിക്കുകയാണ് ഭക്ഷ്യ സുരക്ഷ വകുപ്പ്. ഒരിക്കൽ വറുത്ത എണ്ണ വീണ്ടും എടുക്കാൻ എന്ത് ചെയ്യണമെന്നും എങ്ങനെ സൂക്ഷിക്കണമെന്നും എപ്പോൾ ഉപയോഗിക്കണമെന്നുമുള്ള നിർദ്ദേശങ്ങളാണ് സുരക്ഷ വകുപ്പ് പുറത്തിറക്കിയിരിക്കുന്നത്.
കുറഞ്ഞ എണ്ണയിൽ ചെരിയ ചൂടിലായിരിക്കണം ഭക്ഷണ സാധനങ്ങൾ വറുക്കേണ്ടത്. ചൂട് അധികമായി എണ്ണയിൽ നിന്ന് പുക വരാൻ പാടില്ല. കരിഞ്ഞ് കറുത്ത നിറമാകുന്നതിന് മുൻപ് തന്നെ ഭക്ഷ്യ വസ്തുക്കൾ എണ്ണയിൽ നിന്ന് കോരി മാറ്റണം. പരമാവധി സ്റ്റെയിൻലസ് സ്റ്റീലിൽ തന്നെയുള്ള പാത്രങ്ങൾ ഉപയോഗിക്കണം. കഴിയുന്നിടത്തോളം ഇരുമ്പ് പാത്രങ്ങൾ ഒഴിവാക്കണം. അരുചിയും പ്രത്യേക മണവും ഇതുമൂലം ഒഴിവാക്കാൻ സാധിക്കും.
ഒരിക്കൽ വറുക്കാൻ ഉപയോഗിച്ച എണ്ണ വീണ്ടും ഉപയോഗിക്കാമോ ? വീട്ടമ്മമാരെ അലട്ടുന്ന ചോദ്യമാണിത്. ഉപയോഗിക്കാൻ പാടില്ല എന്നതാണ് ശരിയായ നിർദ്ദേശം. ഇനി അഥവാ ഉപയോഗിക്കേണ്ടി വന്നാൽ തന്നെ എണ്ണ അരിച്ചെടുത്ത ശേഷം ഒറ്റത്തവണ കറികൾ ഉണ്ടാക്കാൻ ഉപയോഗിക്കാം. ഇത്തരത്തിലുള്ള എണ്ണ രണ്ട് ദിവസത്തിനുള്ളിൽ തന്നെ ഉപയോഗിക്കുകയും വേണമെന്നാണ് ഭക്ഷ്യ സുരക്ഷ വകുപ്പ് പുറത്തു വിട്ട നിർദ്ദേശങ്ങളിൽ പറയുന്നത്.
Comments