വാഹനപ്രേമികൾക്കായി തങ്ങളുടെ പുതിയ 2023 ഹോണ്ട സിവിക് ടൈപ്പ് R വാഹനം അവതരിപ്പിച്ച് ജാപ്പനീസ് വാഹന ബ്രാന്ഡായ ഹോണ്ട. ടൈപ്പ് ആറിന്റെ 30 വർഷത്തെ ചരിത്രത്തിലെ ഏറ്റവും ശക്തമായ മോഡലാണ് ഈ കാർ എന്ന് കമ്പനി പറയുന്നു. 1997 മോഡലായി ജപ്പാനിൽ അരങ്ങേറ്റം കുറിച്ചതിന് ശേഷമുള്ള സിവികിന്റെ ആറാമത്തെ വേരിയന്റാണ് 2023 സിവിക് ടൈപ്പ് R. എയറോഡൈനാമിക് പ്രകടനം മെച്ചപ്പെടുത്തുന്ന ഡിസൈനാണ് വാഹനത്തിന് നൽകിയിരിക്കുന്നത്. പുതിയ മോഡലിനെ എല്ലാത്തരത്തിലും തങ്ങളുടെ എൻജിനീയർമാർ പരിഷ്കരിച്ചിട്ടുണ്ടെന്ന് ഹോണ്ട അവകാശപ്പെടുന്നു.
പുതിയ ബോണറ്റും അതിൽ ഒരു സ്കൂപ്പും നവീകരിച്ച ലോവർ ഗ്രില്ലും പുതിയ ടൈപ്പ് ആറിന് കാണാം. എഞ്ചിനിലേക്കുള്ള വായുപ്രവാഹം വർദ്ധിപ്പിക്കാൻ വലിയ ലോവർ ഗ്രില്ലും, മുൻ വശത്തെ വായുപ്രവാഹം വർദ്ധിപ്പിക്കാൻ ബോണറ്റിന് ഒരു വെന്റും നൽകിയിട്ടുണ്ട്. പിൻഭാഗത്ത് വലിയ ഫിക്സഡ് റിയർ വിംഗ്, ബ്ലാക്ക്ഡ്-ഔട്ട് ഡിഫ്യൂസർ, ട്രിപ്പിൾ ടെയിൽപൈപ്പുകൾ എന്നിവ ഉൾപ്പെടുന്നു. എയറോഡൈനാമിക്സ് കൂടുതൽ മെച്ചപ്പെടുത്താൻ മുൻ ചക്രങ്ങൾക്ക് പിന്നിലുള്ള വലിയ അപ്പേർച്ചർ വെന്റുകളും റിയർ ഡിഫ്യൂസറും സിവിക് ടൈപ്പ് R നെ സഹായിക്കും.
ശ്രദ്ധേയമായ 5 നിറങ്ങളിലാണ് സിവിക് ടൈപ്പ് R ലഭ്യമാകുക. ഹിസ്റ്റോറിക് ചാമ്പ്യൻഷിപ്പ് വൈറ്റ്, സോളിഡ് റാലി റെഡ്, റേസിംഗ് ബ്ലൂ, ക്രിസ്റ്റൽ ബ്ലാക്ക്, സോണിക് ഗ്രേ പേൾസ് എന്നീ നിറങ്ങളിലാണ് വാഹനമെത്തുന്നത്. സിവിക് e-HEVയ്ക്ക് സമാനമാണ് സിവിക് ടൈപ്പ് Rന്റെ ക്യാബിൻ. എന്നാലും 10.2 ഇഞ്ച് ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, ഡിജിറ്റൽ കോക്ക്പിറ്റ്, സ്പോർട്സ് സീറ്റ്, റെഡ് ടൈപ്പ് ആർ ട്രിം എന്നിവ വാഹനത്തിന് പുതിയതായി കമ്പനി നൽകിയിരിക്കുന്നു. പുതിയ സിവിക് ടൈപ്പ് ആറിന്റെ മറ്റ് സവിശേഷതകളൊന്നും ഹോണ്ട വെളിപ്പെടുത്തിയിട്ടില്ല. എന്നാൽ ഇതിന് 2.0 ലിറ്റർ ടർബോചാർജ്ഡ് എഞ്ചിൻ ലഭിക്കുമെന്ന് കമ്പനി സ്ഥിരീകരിക്കുന്നു.
