കീനു റീവ്സ് ആരാധകരും ആക്ഷൻ സിനിമാ പ്രേമികളും ഒരു പോലെ കാത്തിരിക്കുന്ന സിനിമയാണ് ജോൺവിക്ക് 4. ചിത്രത്തിന്റെ രോമാഞ്ചം കൊള്ളിക്കുന്ന ട്രെയിലർ അണിയറ പ്രവർത്തകർ പുറത്ത് വിട്ടു. 2014-ൽ പുറത്തിറങ്ങിയ അമേരിക്കൻ നിയോ-നോയർ ആക്ഷൻ ത്രില്ലർ ചിത്രമാണ് ജോൺ വിക്ക്. ചാഡ് സ്റ്റാഹെൽസ്‌കി സംവിധാനം ചെയ്ത ചിത്രത്തിൽ കീനു റീവ്‌സിന്റെ ഏറ്റവും മികച്ച പ്രകടനമാണ് കാണാൻ കഴിഞ്ഞിരുന്നത്. മുൻ കൊലയാളിയായ ജോൺവിക്ക് തന്റെ ഭൂതകാലം ഉപേക്ഷിച്ച് കഴിയുന്ന വ്യക്തിയാണ്. എന്നാൽ ഒരു സംഘം അക്രമികൾ വിക്കിന്റെ വീട് ആക്രമിക്കുകയും ഭാര്യ മരിക്കുന്നതിന് മുമ്പ് അദ്ദേഹത്തിന് സമ്മാനമായി നൽകിയ നായ കുട്ടിയെ ക്രൂരമായി കൊല്ലുകയും ചെയ്യുന്നു. തന്റെ ഭാര്യയുടെ ഓർമ്മയായ നായക്കുട്ടി മരിച്ചതോടെ ജോൺവിക്ക് തന്റെ പഴയ ക്രൂര രൂപത്തിലേയ്‌ക്ക് മടങ്ങി പോകുകയാണ്.

നായക്കുട്ടിയെ കൊന്ന അക്രമി സംഘത്തെ കൊല്ലാൻ അയാൾ യാത്ര ആരംഭിക്കുന്നതാണ് ജോൺ വിക്കിന്റെ ആദ്യ ഭാ​ഗമെങ്കിൽ, ഒരു നായ കുട്ടിയ്‌ക്ക് വേണ്ടി തുടങ്ങിയ പോരാട്ടം ലോകം മുഴുവൻ വ്യാപിച്ചു കിടക്കുന്ന ഒരു അധോലോക സംഘങ്ങൾക്കെതിരെയുള്ള നായകന്റെ പോരാട്ടമായി മാറുകയാണ്. നായകൻ തന്റെ മുന്നിൽ വരുന്ന പ്രതിസന്ധികളെ ഏങ്ങനെ നേരിടുന്നുവെന്ന് ചിത്രീകിക്കുന്നതാണ് ആദ്യ ഭാ​ഗത്തിന്റെ തുടർച്ചയായി വന്ന ചിത്രങ്ങൾ. മൂന്ന് ഭാ​ഗങ്ങളാണ് ഇതുവരെ റിലീസ് ആയിട്ടുള്ളത്. മൂന്നാം ഭാ​ഗം വളരെ ആകാംക്ഷഭരിതമായാണ് അവസാനിക്കുന്നത്. ചിത്രത്തിന്റെ നാലാം ഭാ​ഗത്തിന്റെ ട്രെയിലറാണ് അണിയറ പ്രവർത്തകർ ഇപ്പോൾ പുറത്ത് വിട്ടിരിക്കുന്നത്.

മൂന്ന് ഭാ​ഗങ്ങളിലേത് പോലെ തന്നെയുള്ള ​ഗംഭീര ആക്ഷൻ സീനുകൾ നാലാം ഭാ​ഗത്തിലും ഉണ്ടെന്ന് ഉറപ്പ് തരുന്ന ട്രെയിലറാണ് പുറത്ത് വന്നിരിക്കുന്നത്. മുൻ ഭാ​ഗങ്ങളിലെ താരങ്ങൾക്കൊപ്പം പുതിയ കഥാപാത്രങ്ങളും നാലാം ഭാ​ഗത്തിൽ ഉൾപ്പെടുന്നു. ലോറൻസ് ഫിഷ്ബേൺ, ഇയാൻ മക്‌ഷെയ്ൻ, ലാൻസ് റെഡ്ഡിക്ക് എന്നിവർ യഥാക്രമം ദി ബോവറി കിംഗ്, വിൻസ്റ്റൺ, ചാരോൺ എന്നീ കഥാപാത്രങ്ങളായി തിരിച്ചെത്തുന്നുണ്ട്. ജാപ്പനീസ് പോപ്പ് ഗായിക റിന സവായാമ ജോൺ വിക്കിലൂടെ ഹോളിവുഡ് അരങ്ങേറ്റം നടത്തുന്നുണ്ട് എന്ന വാർത്തയും ലഭിക്കുന്നുണ്ട്.