തിരുവനന്തപുരം: മുഖ്യമന്ത്രി പിണറായി വിജയനെതിരെ കരിങ്കൊടി കാണിച്ച യൂത്ത് കോൺഗ്രസ് പ്രവർത്തകരെ അറസ്റ്റ് ചെയ്തു. മംഗലപുരം ആശാൻ സ്മാരകത്തിൽ എത്തിയ മുഖ്യമന്ത്രിയെ മംഗലപുരം ജംഗ്ഷനിൽ കരിങ്കൊടി കാണിച്ച യൂത്ത് കോൺഗ്രസ് പ്രവർത്തകരെയാണ് പോലീസ് അറസ്റ്റ് ചെയ്ത് നീക്കിയത്. യൂത്ത് കോൺഗ്ര്സ് ജില്ലാ വൈസ് പ്രസിഡന്റ് സജിത് മുട്ടപ്പലം, സെക്രട്ടറി ബിനോയ് എന്നിവരാണ് അറസ്റ്റിലായതെന്ന് പോലീസ് അറിയിച്ചു.
അതിനിടെ ആറ്റിങ്ങൽ നഗരൂരിൽ മുഖ്യമന്ത്രി കടന്നുപോകുന്ന വഴിയരികിൽ നിന്ന് നാല് യൂത്ത് കോൺഗ്രസ് പ്രവർത്തകരെയും പോലീസ് കസ്റ്റഡിയിലെടുത്തു. കരിങ്കൊടി കാണിക്കാൻ ശ്രമിച്ചുവെന്നാരോപിച്ചാണ് ഇവരെ പോലീസ് കസ്റ്റഡിയിലെടുത്തത്.
കഴിഞ്ഞ ദിവസം വിളപ്പിൽശാലയിൽ മുഖ്യമന്ത്രിക്ക് നേരെ കരിങ്കൊടി കാണിച്ച് പ്രതിഷേധിച്ച രണ്ട് യൂത്ത് കോൺഗ്രസ് പ്രവർത്തകരെ പോലീസ് അറസ്റ്റ് ചെയ്തിരുന്നു. എം.ആർ ബൈജു, സത്യദാസ് എന്നിവരാണ് അറസ്റ്റിലായത്. മുഖ്യമന്ത്രിയുടെ യാത്രയിലുടനീളം കരിങ്കൊടി കാണിക്കുമെന്ന് യൂത്ത് കോൺഗ്രസ് സംസ്ഥാന പ്രസിഡന്റ് ഷാഫി പറമ്പിൽ പ്രഖ്യാപിച്ചതിന് പിന്നാലെയാണ് കരിങ്കൊടി പ്രതിഷേധം കനത്തത്. ഈ സാഹചര്യത്തിൽ മുഖ്യമന്ത്രിയുടെ സുരക്ഷ വീണ്ടും വർധിപ്പിക്കുകയും ചെയ്തിരുന്നു.
Comments