കൊൽക്കത്ത: എസ്എസ്‌സി അഴിമതി കേസിൽ മന്ത്രി പാർത്ഥ ചാറ്റർജി അറസ്റ്റിലായതിന് പിന്നാലെ തൃണമൂൽ കോൺഗ്രസിനെയും ബംഗാൾ മുഖ്യമന്ത്രി മമതാ ബാനർജിയെയും കടന്നാക്രമിച്ച് ബിജെപി. സംഭവത്തിൽ ഇതുവരെ പാർട്ടി അദ്ധ്യക്ഷകൂടിയായ മമത പ്രതികരിച്ചിട്ടില്ല. ഇതോടെയാണ് മുഖ്യമന്ത്രിയുടെ മൗനത്തിനെതിരെ ബിജെപി രംഗത്ത് വന്നത്.
അറസ്റ്റിൽ മൗനം പാലിക്കുന്നതിലൂടെ പാർത്ഥ ചാറ്റർജിയിൽ നിന്നും അകലം പാലിക്കാനാണ് മമതയുടെ ശ്രമമെന്ന് ബിജെപി വക്താവ് അമിത് മാളവ്യ പറഞ്ഞു. എന്നാൽ ഇരുവരും തമ്മിലുള്ള ബന്ധം എല്ലാവർക്കും അറിയാം. മമതയുടെ അടുത്ത അനുയായി ആണ് പാർത്ഥ ചാറ്റർജിയെന്നും അദ്ദേഹം വ്യക്തമാക്കി.
തൃണമൂൽ കോൺഗ്രസും മന്ത്രിമാരും നടത്തുന്ന കുറ്റകൃത്യങ്ങൾ മറച്ചുവയ്‌ക്കാൻ മമത കേന്ദ്ര ഏജൻസികൾക്കെതിരെ അനാവശ്യ ആരോപണങ്ങൾ ഉന്നയിക്കുകയാണെന്ന് കേന്ദ്രമന്ത്രി രാജീവ് ചന്ദ്രശേഖറും കൂട്ടിച്ചേർത്തു.
