രണ്ടാം ലോകമഹായുദ്ധത്തിൽ മോട്ടോർസൈക്കിളുകൾ വലിയ പങ്ക് വഹിച്ചിട്ടുണ്ട്. BSA, BMW, Harley-Davidson, NSU, Triumph, Zundapp തുടങ്ങിയ ബാഡ്ജുകൾ എല്ലാം അക്കാലങ്ങളിൽ ഉപയോഗിച്ചിരുന്നു. എന്നാൽ ചെറുതും എവിടേയും കൊണ്ടുനടക്കാൻ കഴിയുന്നതുമായ ഒരു കുഞ്ഞൻ മോട്ടോർസൈക്കിൾ രണ്ടാം ലോകമഹായുദ്ധത്തിലെ പ്രധാന ആകർഷണമായിരുന്നു. ആ മോർട്ടോർസൈക്കിളിനെ ‘വെൽബൈക്ക്’ എന്ന് വിളിക്കുന്നു. യുദ്ധഭൂമിയിൽ സൈനികർക്ക് വേഗത്തിൽ സഞ്ചരിക്കാൻ ഇത്തിരി കുഞ്ഞനും ഭാരം കുറഞ്ഞതുമായ വെൽബൈക്ക് ഏറെ സഹായിച്ചിട്ടുണ്ട്.
ഈ ഇത്തിരികുഞ്ഞൻ മോട്ടോർസൈക്കിളിന്റെ ഉത്ഭവം ഒന്ന് പരിശോധിക്കാം. സൈനികർക്ക് എയർ-ഡ്രോപ്പ് ചെയ്യാൻ ഉപയോഗിക്കുന്ന സ്റ്റാൻഡേർഡ് CLE (കണ്ടെയ്നർ ലൈറ്റ് എക്യുപ്മെന്റ്) കാനിസ്റ്ററുകളിൽ ഉൾക്കൊള്ളുന്ന ഒരു മോട്ടോർസൈക്കിൾ രൂപകൽപ്പന ചെയ്യുക എന്നതായിരുന്നു ആശയം. അതിനർത്ഥം വെൽബൈക്ക് ആറടിയിൽ താഴെ നീളവും ഒന്നരയടി വ്യാസവുമുള്ള ഒരു കാനിസ്റ്ററിൽ ഘടിപ്പിക്കുന്ന തരത്തിലാണ് രൂപകല്പന ചെയ്യേണ്ടത്. വെൽവിൻ പട്ടണത്തിൽ സ്ഥിതി ചെയ്യുന്ന സ്റ്റേഷൻ IX എന്നറിയപ്പെടുന്ന ഒരു രഹസ്യ ബ്രിട്ടീഷ് സ്പെഷ്യൽ ഓപ്പറേറ്റീവ് ഇടത്തിലാണ് ഈ മോട്ടോർസൈക്കിൾ വികസിപ്പിച്ചെടുത്തത്. ഇതിന് വെൽബൈക്ക് എന്ന് പേരും നൽകി.
ഒരു വില്ലിയേഴ്സ് ജൂനിയർ ഡീലക്സ് 98 സിസി ടു-സ്ട്രോക്ക് എഞ്ചിനാണ് ഇതിന് ഉപയോഗിച്ചിരിക്കുന്നത്. കാരണം അതിന്റെ കുറുകെയുളള സിലിണ്ടർ വാഹനത്തിന്റെ രൂപകല്പനയ്ക്ക് അനിയോജ്യമാണ്. വലിപ്പത്തിനും ഭാരത്തിനും പ്രാധാന്യം നൽകിയിരുന്ന ഈ മോട്ടോർസൈക്കിളിന് സസ്പെൻഷൻ, ഫ്രണ്ട് ബ്രേക്കും ഇല്ല. ഹാൻഡിൽബാറും സീറ്റും CLE കണ്ടെയ്നറിൽ ഒതുക്കാൻ കഴിയുന്ന തരത്തിലാണ് രൂപകൽപ്പന ചെയ്തിരിക്കുന്നത്. ഡിസൈൻ പൂർത്തിയായിക്കഴിഞ്ഞാൽ, വിമാനത്തിൽ നിന്ന് യുദ്ധഭൂമിയിലേക്കുള്ള യാത്ര നടത്താൻ കഴിയുമെന്ന് ഉറപ്പാക്കാൻ അക്കാലത്ത് ഇത് പരീക്ഷിച്ചും നോക്കി.
3.7 ലിറ്റർ ഇന്ധന ടാങ്കും ട്യൂബുലാർ സ്റ്റീൽ ഷാസിയും സിംഗിൾ സ്പീഡ് ട്രാൻസ്മിഷനോടുകൂടിയ 1.5 എച്ച്പി എഞ്ചിനുമുള്ള 35-ഓളം കിലോയുള്ള മോട്ടോർസൈക്കിളാണ് വെൽബൈക്ക്. ഇതിന്റെ നിർമ്മാണവും വികസനവും ബ്രിട്ടീഷ് മോട്ടോർസൈക്കിൾ കമ്പനിയായ എക്സൽസിയറാണ് നടത്തിയിരുന്നത്. 1942 മുതൽ 1943 വരെ ഏകദേശം നാലായിരത്തോളം വെൽബൈക്കുകൾ നിർമ്മിക്കപ്പെട്ടിരുന്നു. ഓപ്പറേഷൻ മാർക്കറ്റ് ഗാർഡൻ, ഓപ്പറേഷൻ ഓവർലോർഡ് എന്നിവയുൾപ്പെടെ രണ്ടാം ലോകമഹായുദ്ധത്തിന്റെ അവസാനത്തിൽ നടന്ന ഏറ്റവും മികച്ച സൈനിക നീക്കങ്ങളിൽ വെൽബൈക്ക് ഒരു പ്രധാന ഘടകമായിരുന്നു. എന്നാൽ ഈ ചെറിയ യുദ്ധ യന്ത്രം ഉദ്ദേശിച്ചത്ര വിജയിച്ചില്ലെന്ന് മാത്രമല്ല, പലപ്പോഴും സൈനികർക്ക് ശത്രുക്കൾക്ക് മുന്നിൽ കീഴടങ്ങേണ്ടി വരുന്ന സാഹചര്യങ്ങളെ സൃഷ്ടിക്കുകയും ചെയ്തു.
15 സെക്കൻഡിനുള്ളിൽ അസംബിൾ ചെയ്ത് ഓടിക്കാൻ കഴിയുന്ന തരത്തിലാണ് വെൽബൈക്ക് രൂപകൽപ്പന ചെയ്തിരിക്കുന്നതെങ്കിലും ചെറിയ ചക്രങ്ങളും ചെറിയ ശക്തിയുമുള്ള ഈ മോട്ടോർസൈക്കിൾ ഓഫ്-റോഡ് യാത്രയ്ക്ക് വേണ്ടവിധത്തിൽ പ്രയോജനപ്പെട്ടില്ല. അതിനാൽ തന്നെ സൈനികർക്ക് ശത്രുക്കളുടെ ആയുധങ്ങൾക്ക് മുന്നിൽ കീഴടങ്ങേണ്ടി വന്നിട്ടുണ്ട്.
