ആഡംബര കാർ നിർമ്മാതാവ് പോർഷെ കയെൻ കൂപ്പെ എസ്യുവി തങ്ങളുടെ പുതിയ ടർബോ ജിടി ഇന്ത്യയിൽ അവതരിപ്പിച്ചു. 2021 ജൂണിൽ ആഗോളതലത്തിൽ അനാച്ഛാദനം ചെയ്യപ്പെട്ട പോർഷെ കയെൻ ടർബോ GT ഇപ്പോൾ ഇന്ത്യൻ വിപണിയിലും ലഭ്യമാക്കിയിരിക്കുകയാണ്. ജർമ്മനിയിലെ പ്രശസ്തമായ നർബർഗിംഗ് നോർഡ്ഷ്ലീഫ് ട്രാക്കിൽ എസ്യുവിക്കായി നടത്തിയ മത്സരത്തിൽ 7 മിനിറ്റ് 38.9 സെക്കന്റിൽ ഏറ്റവും വേഗതയേറിയ ലാപ് ടൈമിന്റെ റെക്കോർഡ് നിലവിൽ കയെൻ ടർബോ GT സ്വന്തമാക്കിയിട്ടുണ്ട്. ഇപ്പോൾ ആഡംബര സ്പോർട്സ് കാറായ കയെൻ ടർബോ GT ഇന്ത്യൻ വിപണിയിലും എത്തിയിരിക്കുന്നു.
2.57 കോടി രൂപയാണ് വാഹനത്തിന്റെ എക്സ്-ഷോറൂം വിലയായി റിപ്പോർട്ട് ചെയ്തിരിക്കുന്നത്. 640 എച്ച്പി പരമാവധി കരുത്തും 850 എൻഎം ടോർക്കും പുറപ്പെടുവിക്കുന്ന 4.0 ലിറ്റർ ബിറ്റുർബോ വി8 പെട്രോൾ എഞ്ചിനിലാണ് കയെൻ ടർബോ GT എസ്യുവി എത്തുന്നത്. ഇന്ത്യയിൽ ലഭ്യമായ സ്റ്റാൻഡേർഡ് കയെൻ ടർബോ കൂപ്പിനെ അപേക്ഷിച്ച് ഇത് 90 എച്ച്പിയും 80 എൻഎമ്മും നേടുന്നു. എന്നിരുന്നാലും കയെന്റെ ആഗോള ലൈനപ്പിൽ ഇത് 680 എച്ച്പി കയെൻ ടർബോ എസ് ഇ-ഹൈബ്രിഡിന് താഴെയാണ്. 8 സ്പീഡ് ടിപ്ട്രോണിക് എസ് ഓട്ടോമാറ്റിക് ട്രാൻസ്മിഷനുമായാണ് വാഹനത്തിന്റെ എഞ്ചിൻ ഘടിപ്പിച്ചിരിക്കുന്നത്. മണിക്കൂറിൽ 300 കിലോമീറ്റർ വേഗതയിൽ വരുന്ന ഇതിന് വെറും 3.3 സെക്കന്റിൽ പൂജ്യത്തിൽ നിന്ന് 100 കിലോമീറ്റർ വോഗത കൈവരിക്കാനാകും.
ഇന്ത്യയിൽ പോർഷെ കയെൻ ടർബോ GT എസ്യുവിയുടെ പ്രധാന എതിരാളികൾ ലംബോർഗിനി ഉറുസും ഓഡി RSQ8 എന്നിവയായിരിക്കും. എതിരാളികളുമായി താരതമ്യപ്പെടുത്തുമ്പോൾ, കയെൻ ടർബോ GT 600hp ഓഡി RSQ8 നേക്കാൾ 40hp കൂടുതൽ ശക്തമാണ്. എന്നാൽ 650hp ലംബോർഗിനി ഉറുസിനേക്കാൾ 10hp കുറവുമാണ്. പക്ഷേ, ഓപ്ഷണൽ സ്പോർട് ക്രോണോ പാക്കേജ് ഘടിപ്പിച്ചാൽ ഉറുസിനേക്കാൾ 100kph 0.3 സെക്കൻഡ് വേഗം കൈവരിക്കാൻ കയെൻ ടർബോ GTയ്ക്ക് സാധിക്കും.
