തമിഴകത്തെ പ്രശസ്ത വ്യവസായി ലെജൻഡ് ശരവണൻ ആദ്യമായി അഭിനയിക്കുന്ന “ദി ലെജൻഡ്” എന്ന ചിത്രത്തിന്റെ പ്രമോഷന് വേണ്ടി കൊച്ചിയിലെത്തി താരങ്ങൾ. കൊച്ചി വിമാനത്താവളത്തിലെത്തിയ ശരവണനെ മാലയിട്ടാണ് യുവാക്കൾ വരവേറ്റത്. സിനിമയിലെ നായികമാരും ചിത്രത്തിന്റെ പ്രമോഷന് വേണ്ടി കൊച്ചിയിലെത്തി. വെള്ള ടീഷർട്ടിൽ ലെജൻഡ് സിനിമയുടെ പോസ്റ്റർ പതിപ്പിച്ചാണ് യുവാക്കൾ താരത്തിനൊപ്പം സിനിമയുടെ പ്രമോഷന് വേണ്ടി തെരുവിലിറങ്ങിയത്.
ആഡംബര കാറുകളുടെയും ബുള്ളറ്റുകളുടെയും അകമ്പടിയോടെ യുവാക്കൾ കൊച്ചിയിൽ റോഡ് ഷോ നടത്തി. നടി ലക്ഷ്മി റായ് അടക്കമുള്ളവർ ലെജൻഡ് ശരവണനൊപ്പമുണ്ട്. അമ്പത്തിരണ്ടുകാരനായ പുതുമുഖ നായകന്റെ അരങ്ങേറ്റ ചിത്രമാണ് ‘ദ് ലെജൻഡ്’ എന്ന സിനിമയിൽ കാണാൻ സാധിക്കുന്നത്. തമിഴകത്ത് കോടികൾ വിറ്റുവരവുള്ള ശരവണ സ്റ്റോഴ്സിന്റെ അമരക്കാരനായ ശരവണൻ സിനിമയിലും വെന്നികൊടി പാറിക്കുമോ എന്നാണ് പ്രേക്ഷകർ ഉറ്റുനോക്കുന്നത്.
ആക്ഷൻ രംഗങ്ങളും പ്രണയ ഗാനങ്ങളും നിറഞ്ഞ ചിത്രമാണ് “ദി ലെജൻഡ്”. തന്റെ രാജ്യത്തെ സംരക്ഷിക്കാൻ ആഗ്രഹിക്കുന്ന ഒരു ശാസ്ത്രജ്ഞന്റെ വേഷമാണ് സിനിമയിൽ ശരവണൻ ചെയ്യുന്നത്. കോടികൾ മുടക്കി ചിത്രീകരിച്ചിരിക്കുന്ന ചിത്രത്തിൽ പ്രഭു, വിവേക്, യോഗി ബാബു, തമ്പി രാമയ്യ, വിജയകുമാർ, നാസർ, മയിൽസാമി, കോവൈ സരള, മൻസൂർ അലിഖാൻ തുടങ്ങി വലിയ താരനിരയാണ് അണിനിരക്കുന്നത്. ജൂലൈ 28ന് റിലീസ് ചെയ്യുന്ന ചിത്രം മാർക്കറ്റ് ചെയ്യാനുള്ള കഠിന പ്രയത്നത്തിലാണ് താരം.
