ഇന്ത്യയിലെ ഏറ്റവും വലിയ ഇരുചക്രവാഹന നിർമ്മാതാക്കളായ ഹീറോ മോട്ടോർകോർപ്പ് തങ്ങളുടെ ആരാധകർക്കായി ജനപ്രിയ മോട്ടോർസൈക്കിളായ സ്പ്ലെൻഡറിന്റെ പുതിയ മോഡൽ പുറത്തിറക്കി. 125 സിസി യുടെ പുതിയ ഓൾഡ്-ബ്ലാക്ക് എഡിഷനാണ് കമ്പനി പുറത്തിറക്കിയിരിക്കുന്നത്. 2022 ഹീറോ സൂപ്പർ സ്പ്ലെൻഡർ ക്യാൻവാസ് ബ്ലാക്ക് എഡിഷൻ എന്ന് വിളിക്കപ്പെടുന്ന 77,430 രൂപയാണ് എക്സ്ഷോറൂം പ്രാരംഭ വിലയായി കമ്പനി പറയുന്നത്.
രണ്ട് വകഭേദങ്ങളിലായാണ് വാഹനം പുറത്തിറങ്ങിയിരിക്കുന്നത്. 81,330 81,330 രൂപ (എക്സ്ഷോറൂം) വിലയിലാണ് ടോപ്-സ്പെക്ക് മോഡൽ പുറത്തിറക്കിയിരിക്കുന്നത്. സ്പ്ലെൻഡറിന്റെ പുതിയ പതിപ്പ് 60 kmpl നും 68 kmpl നും ഇടയിൽ മെച്ചപ്പെട്ട മൈലേജ് കമ്പനി വാഗ്ദാനം ചെയ്യുന്നുണ്ട്. അതായത് ഏകദേശം 13 ശതമാനം വർദ്ധന. ഹീറോ മോട്ടോർകോർപ്പിന്റെ ഏറ്റവും വിറ്റുവരവുള്ള വാഹനമാണ് സ്പ്ലെൻഡർ. അതിനാൽ തന്നെ പുതിയ പതിപ്പും ഏറെ ശ്രദ്ധനേടും എന്നു തന്നെയാണ് കമ്പനി പ്രതീക്ഷിക്കുന്നത്.
വാഹനം ഡിസൈൻ ചെയ്തിരിക്കുന്നത് സ്പ്ലെൻഡറിന്റെ മറ്റ് വകഭേദങ്ങൾക്ക് സമാനം തന്നെയാണ്. എന്നാൽ പുതിയ എഡിഷന്റെ പ്രധാന മാറ്റം കമ്പനി അവയ്ക്ക് നൽകിയിരിക്കുന്ന നിറം തന്നെയാണ്. ക്യാൻവാസ് ബ്ലാക്ക് നിറത്തിൽ വളരെ ആകർഷണീയമാണ് പുതിയ സ്പ്ലെൻഡർ. സൂപ്പർ സ്പ്ലെൻഡർ എന്നുള്ള 3D എഴുത്ത്, എച്ച് ലോഗോ എന്നിവയിൽ സൂക്ഷ്മമായ മെച്ചപ്പെടുത്തലുകൾ കമ്പനി വരുത്തിയയിരിക്കുന്നു. പുതിയ സൂപ്പർ സ്പ്ലെൻഡർ ക്യാൻവാസ് ബ്ലാക്ക് പതിപ്പിന് ഡിജിറ്റൽ അനലോഗ് ഇൻസ്ട്രുമെന്റ് ക്ലസ്റ്ററും ഒരു സംയോജിത യുഎസ്ബി ചാർജറും ലഭിക്കുന്നുണ്ട്.
125 സിസി, എയർ കൂൾഡ്, സിംഗിൾ സിലിണ്ടർ എഞ്ചിനാണ് സൂപ്പർ സ്പ്ലെൻഡർ ക്യാൻവാസ് ബ്ലാക്കിന്. 7,500 ആർപിഎമ്മിൽ 10.7 ബിഎച്ച്പിയും 6,000 ആർപിഎമ്മിൽ 10.6 എൻഎം ടോർക്കും സൃഷ്ടിക്കാൻ പുതിയ മോഡലിന് സാധിക്കും. അഞ്ച് സ്പീഡ് ഗിയർബോക്സുമായി ബന്ധിപ്പിച്ചിരിക്കുന്നു.
