അനിയത്തിപ്രാവ് എന്ന മലയാള ചിത്രത്തിലൂടെ മലയാളി പ്രേക്ഷകർക്ക് പ്രിയങ്കരനായ നായകനാണ് കുഞ്ചാക്കോ ബോബൻ. നിരവധി ഹിറ്റുസിനിമകൾ മലയാളത്തിന് സമ്മാനിച്ച താരം. ചോക്ലേറ്റ് പയ്യൻ വേഷങ്ങൾ മാത്രമല്ല എല്ലാ കഥാപാത്രങ്ങളും തന്റെ കയ്യിൽ ഭദ്രമാണെന്ന് തെളിയിച്ച പ്രിയ താരം. സമൂഹമാദ്ധ്യമത്തിൽ ഇപ്പോൾ ചർച്ചയാവുന്നത് ഒരു കഥാപാത്രത്തിൽ നിന്ന് മറ്റ് കഥാപാത്രങ്ങളിലേക്ക് മാറുന്ന കുഞ്ചാക്കോ ബോബനെ പറ്റിയാണ്. ‘ന്നാ താൻ കേസ് കൊട്’ എന്ന ചിത്രത്തിലെ ”ദേവദൂതർ പാടി..” എന്ന ഗാനത്തിന് കഴിഞ്ഞ ദിവസം താരം ചുവട് വച്ചിരുന്നു. ഇതാണ് ചർച്ചകൾക്ക് തുടക്കം കുറിച്ചത്.
ചുവടുകളുമായി ഗാനത്തിൽ നിറഞ്ഞു നിൽക്കുകയാണ് താരം. വലിയ ആവേശത്തോടെയാണ് പ്രേക്ഷകർ ഗാനത്തേയും താരത്തിന്റെ പ്രകടനത്തെയും ഏറ്റെടുത്തിരിക്കുന്നത്. എന്നാൽ ഇതേഗാനത്തിന് താരം ചുവട് വെയ്ക്കുന്നതിന്റെ ദൃശ്യങ്ങൾ വീണ്ടും വൈറലായിരിക്കുകയാണ്. കോളേജ് കുട്ടികൾക്കൊപ്പം ചുവടുവെയ്ക്കുന്ന ദൃശ്യങ്ങളാണ് സമൂഹമാദ്ധ്യമത്തിൽ തരംഗമായിരിക്കുന്നത്.
വരാനിരിക്കുന്ന ഒരു ചിത്രത്തിന്റെ പ്രമോഷനുമായി ബന്ധപ്പെട്ട് ബ്രണ്ണൻ കോളേജിൽ എത്തിയതായിരുന്നു താരവും അണിയറപ്രവർത്തകരും. വേദിയിൽ കുട്ടികൾക്കൊപ്പം ആടിപ്പാടിയ കുഞ്ചാക്കോ ബോബനെ കയ്യടികളോടെയാണ് കുട്ടികൾ സ്വീകരിച്ചത്.
കാതോട് കാതോരം എന്ന ചിത്രത്തിൽ ഇറങ്ങിയ ‘ദേവദൂതർ പാടി’ എന്ന ഗാനമാണ് പുനർസൃഷ്ടിച്ചിരിക്കുന്നത്.37 വർഷങ്ങൾക്കു മുൻപ് ഇറങ്ങിയ ഗാനമാണ് ഇത്.ഒഎൻവിയുടെ വരികൾക്ക് ഔസേപ്പച്ചനാണ് സംഗീതം പകർന്നിരിക്കുന്നത്.
