ബിഎംഡബ്ല്യുവിന് കീഴിലുള്ള ഐക്കണിക്ക് ബ്രിട്ടീഷ് വാഹന ബ്രാന്ഡാണ് മിനി കൂപ്പർ തങ്ങളുടെ പുതിയ ഇലക്ട്രിക് വാഹനങ്ങൾ അവതരിപ്പിക്കുകയാണ്. മിനി നിരയിലേയ്ക്ക് തങ്ങളുടെ പുതിയ ഒരു അവതാരത്തെ കൂടി പരിചയപ്പെടുത്തുകയാണ് കമ്പനി. മിനി എയ്സ്മാൻ എന്ന് പേര് നൽകിയിരിക്കുന്ന വാഹനം അടിമുടി കളർഫുൾ ആണ്. ബ്രാൻഡിൽ നിന്നുള്ള ആദ്യത്തെ ഓൾ-ഇലക്ട്രിക് ക്രോസ്ഓവർ മോഡലായിരിക്കും ഈ വാഹനമെന്ന് കമ്പനി പറയുന്നു.
2020-ലെ മിനി ഇലക്ട്രിക് (കൂപ്പർ എസ്ഇ) നിന്ന് തികച്ചും വ്യത്യസ്തമാണ് മിനി എയ്സ്മാൻ. ഉൽപ്പാദനത്തിലേക്ക് കടക്കുമ്പോൾ മിനി ഹാച്ച്ബാക്കിനും കൺട്രിമാൻ എസ്യുവിക്കും ഇടയിലാണ് മിനി എയ്സ്മാൻ സ്ഥാനം പിടിക്കുക. ബിഎംഡബ്ല്യുവും ഗ്രേറ്റ് വാളും സംയുക്തമായി വികസിപ്പിച്ചുകൊണ്ടിരിക്കുന്ന പുതിയ സ്പോട്ട്ലൈറ്റ് ആർക്കിടെക്ചറിന്റെ സ്ട്രെച്ചഡ് പതിപ്പിനെ അടിസ്ഥാനമാക്കിയുള്ളതാണ് എയ്സ്മാൻ. 2024-ഓടെ വാഹനം വിപണിയിലെത്തിക്കുമെന്ന് കമ്പനി വ്യക്തമാക്കുന്നു.
ഷോർട്ട് ഫ്രണ്ട്, റിയർ ഓവർഹാംഗുകൾ പോലെയുള്ള ചില ക്ലാസിക് മിനി ഡിസൈൻ ഫീച്ചറുകൾ എയ്സ്മാൻ നിലനിർത്തുന്നുണ്ട്. എന്നാൽ വീൽ ആർച്ചുകളിലും വാതിലുകളിലും വലിയ മാറ്റങ്ങൾ വരുത്തിയിട്ടുണ്ട്. മിനി മോഡലുകളിൽ കാണുന്ന ക്രോമിൽ നിന്ന് വ്യത്യസ്തമായി ഫ്ലഷ് ഡോർ ഹാൻഡിലുകളാണ് എയ്സ്മാന്റെ പ്രധാന ആകർഷണീയത. സാധാരണയായി കാണുന്ന വൃത്താകൃതിയിലുള്ള ഹെഡ്ലാമ്പുകൾ ഉപേക്ഷിച്ച് ഏതാണ്ട് ത്രികോണാകൃതിയിലാണ് രൂപകല്പന ചെയ്തിരിക്കുന്നത്. കൂടാതെ ഷഡ്ഭുജാകൃതിയിലുള്ള ഗ്രില്ലിൽ എൽഇഡിയും നൽകിയിരിക്കുന്നു.
എയ്സ്മാന്റെ ബാറ്ററി വലിപ്പത്തെപ്പറ്റിയോ മറ്റ് വിവരങ്ങളോ മിനി ഇതുവരെ വെളിപ്പെടുത്തിയിട്ടില്ല. 13 അടി നീളവും 6.5 അടിയിൽ താഴെ വീതിയും ഉള്ളതിനാൽ എയ്സ്മാൻ നിലവിലുള്ള കൺട്രിമാന്റെ അതേ വലിപ്പമാണ്. അതേസമയം, വാഹനത്തിന്റെ രൂപഭംഗിയിലുള്ള പുതിയ മാറ്റങ്ങൾ എയ്സ്മാനെ വലിപ്പമുള്ള മോഡലായി തോന്നിപ്പിക്കും. 2021ൽ ലോകമെമ്പാടും 302,000 കാറുകൾ വിറ്റ മിനി, 2027-ഓടെ വിൽപ്പനയുടെ പകുതിയും EV-കളായിരിക്കുമെന്ന് പ്രതീക്ഷിക്കുന്നു.
