പാപ്പൻ സിനിമയുടെ വമ്പൻ വിജയത്തിൽ പ്രതികരിച്ച് സുരേഷ് ഗോപി. വിജയത്തിൽ സന്തോഷമുണ്ടെന്നും അത്ര മികച്ച ഒരു ചിത്രമല്ലെങ്കിൽ പോലും കാവൽ എന്ന സിനിമ സ്വീകരിച്ചവരാണ് മലയാളികൾ എന്നും രാഷ്ട്രീയമൊന്നും സിനിമയെ ബാധിക്കില്ലെന്നും അദ്ദേഹം വ്യക്തമാക്കി. ജനങ്ങൾ സിനിമ കാണുന്നത് രാഷ്ട്രീയം നോക്കിയല്ല. അതു നിങ്ങൾക്ക് സിനിമയുടെ കളക്ഷൻ വരുമ്പോൾ മനസ്സിലാകുമെന്നും മാദ്ധ്യമങ്ങളോട് സുരേഷ് ഗോപി പറഞ്ഞു.
കുറച്ച് മതഭ്രാന്തർ മാത്രമാണ് സിനിമയ്ക്കെതിരെയും തനിക്കെതിരെയും മോശം പറയുന്നത്. കലയെ സ്നേഹിക്കുന്ന ഹൃദയങ്ങൾക്ക് മതവുമില്ല, രാഷ്ട്രീയവുമില്ല എന്ന് സുരേഷ് ഗോപി പറഞ്ഞു. തൊണ്ണൂറുകളിൽ തിയറ്ററുകൾ ഇളക്കിമറിച്ച ജോഷി-സുരേഷ് ഗോപി കോംബോ വർഷങ്ങൾക്കുശേഷം തിരിച്ചെത്തുന്ന ചിത്രമാണ് പാപ്പാൻ. കേരളത്തിലാകമാനം ഇന്ന് 250ൽ അധികം തിയറ്ററുകളിൽ റിലീസിനെത്തിയ ചിത്രത്തിന് എങ്ങും മികച്ച പ്രതികരണമാണ് പ്രേക്ഷകരിൽ നിന്ന് ലഭിക്കുന്നത്.
മാസ്സ് ഫാമിലി ക്രൈം ഇൻവസ്റ്റിഗേഷൻ ത്രില്ലറായി ഒരുക്കിയിരിക്കുന്ന ചിത്രം മലയാളത്തിലിറങ്ങിയ മികച്ച ത്രില്ലറുകളിൽ ഒന്നാണെന്ന് സിനിമാ പ്രേമികൾ പറയുന്നു. ജോഷി ചിത്രങ്ങളിൽ ഇതുവരെ കണ്ടിട്ടില്ലാത്ത മറ്റൊരു സുരേഷ് ഗോപിയെയാണ് സിനിമയിൽ കാണാൻ സാധിക്കുന്നത്. മികച്ച അഭിനയ പ്രകടനമാണ് പാപ്പനിൽ നടന്റേത്. സുരേഷ് ഗോപിയ്ക്കൊപ്പം മകൻ ഗോകുൽ സുരേഷും മകളായി അഭിനയിക്കുന്ന നീത പിള്ളയും തിയറ്ററുകളിൽ കൈയ്യടി നേടുന്നു. സുരേഷ് ഗോപിയുടെ തന്നെ ഏറ്റവും കൂടുതൽ കളക്ഷൻ സ്വന്തമാക്കുന്ന സിനിമയായി മാറും പാപ്പൻ എന്നാണ് ആരാധകർ വിലയിരുത്തുന്നത്.
