അബുദാബി: ഇസ്ലാം വർഷാരംഭമായ മുഹ്റം ഒന്നിന് ഷാർജയിലും അബുദാബിയിലും സൗജന്യ പാർക്കിംഗ് പ്രഖ്യാപിച്ചു. ടോൾ നിരക്കും അതേദിവസം ഈടാക്കില്ലെന്ന് അബുദാബി ഇന്റഗ്രേറ്റഡ് ട്രാൻസ്പോർട്ട് സെന്റർ അറിയിച്ചു.
പിഴ ഒഴിവാക്കുന്നതിനായി അവധിക്കാലത്ത് പാർക്കിംഗ് സൗകര്യം ശരിയായി ഉപയോഗിക്കണമെന്ന് മുൻസിപ്പാലിറ്റി അഭ്യർത്ഥിച്ചു. വെള്ളിയാഴ്ചകളും ഔദ്യോഗിക അവധി ദിനങ്ങളും ഉൾപ്പെടെ ആഴ്ചയിൽ എല്ലാദിവസവും ഫീസ് ഈടാക്കുന്ന പാർക്കിംഗ് സോണുകളെ ഈ തീരുമാനം ബാധിക്കില്ലെന്ന് ഷാർജ മുൻസിപ്പാലിറ്റി വ്യക്തമാക്കി.
നിരോധിത സ്ഥലങ്ങളിൽ വാഹനങ്ങൾ പാർക്ക് ചെയ്യരുതെന്നും ഗതാഗതം തടസപ്പെടുത്തരുതെന്നും ഐടിസി പൊതുജനങ്ങളോട് അഭ്യർത്ഥിച്ചു. രാത്രി 9 മുതൽ രാവിലെ 8 വരെ റെസിഡന്റ് പെർമിറ്റ് പാർക്കിംഗ് ബേകൾ സംബന്ധിച്ച നിയന്ത്രണങ്ങൾ പാലിക്കണമെന്നും അധികൃതർ അറിയിച്ചു. ജൂലായ് 30 മുഹ്റം ഒന്നിനോടനുബന്ധിച്ച് യുഎഇയിലെ പൊതു-സ്വകാര്യ മേഖല ജീവനക്കാർക്ക് കഴിഞ്ഞ ദിവസമാണ് അവധി പ്രഖ്യാപിച്ചത്. അബുദാബിയിലെ കസ്റ്റമേഴ്സ് ഹാപ്പിനസ് സെന്ററുകൾ മുഹ്റം ഒന്നിന് അടച്ചിട്ട് തിങ്കളാഴ്ചയാണ് പ്രവർത്തനം ആരംഭിക്കുക.
